Асрор Алиқулов: "Йўқотишларимизни ҳисобга олсак, дуранг керакли натижа"

Про лиганинг 13-турида “Хоразм” – “Машъал” тўқнашувида ҳисоб очилмади. Учрашувдан сўнг меҳмонлар бош мураббийи Асрор Алиқулов ўз фикрларини билдирди.

“Биринчи навбатда курашга бой ўйин бўлди. Жисмоний ҳолат ва характер асосий ўринга чиқди. “Хоразм” ҳам, бизнинг футболчилар ҳам тўхташгани йўқ. Ҳавонинг иссиқлиги ўйин темпига таъсир кўрсатди, десам тўғри бўлади. Охирги сонияларгача ўйин тақдири футболчиларни ҳам, мураббийларни ҳам асабий ҳолатда ушлаб турди. Қайсидир маънода дуранг - йўқотишларимизни ҳисобга олсак, бизга керакли натижа, дейиш мумкин.

Биз ётиб олиб узун паслар билан ўйнамоқчи эмасмиз. Фақат бугун майдоннинг ҳолати ҳам таъсир қилди. Қисқа паслар билан ўйнашга ҳаракат қиламиз. Лекин бугун қисқа паслар учун майдоннинг ҳолати тўғри келмасди. Футболчиларимизда бир қатор боғламлар узилиб қолди. Кўпроқ ҳужум қилишни ўйладик. Аммо рақиб мажбурласа чуқур ҳимояланиш ҳам мумкин.

Про лигада олдингига нисбатан бу йил жамоалар анча кучайтирди десак бўлади. Чунки кўплаб Суперлига футболчилари про лигада иштирок этишяпти. Суперлиганинг ҳам савияси анча кўтарилди. “Бухоро”, “Шўртан”, “Қўқон-1912” каби жамоаларда Суперлигада тўп сурган кўплаб ўйинчилар бор. Про лигада ўткинчи ўйинлар йўқ ва очко олиш осон эмас.

Сарвар Бекжанов “Хоразм” футбол мактаби тарбияланувчиси. Кейинчалик “Машъал” академияси ва U19 да ўйнади. Уни иккита учрашувдан бери асосий таркибда майдонга туширяпмиз. Бундан олдинги учрашувда яхшироқ ҳаракат қилганди. Бугун озроқ ёшлиги ва курашларда кучи етмаслиги сезилди. Барибир ўйинидан қониқиш ҳосил қилдик. Ўз устида ишлаяпти. Умид қиламиз, яхши футболчи бўлиб етишади.

Европа чемпионатида Германия терма жамоасининг ўйини жуда ёқди. Ўйинни назорат қилиш ва мувозанат доим футболчиларда бўлиши керак. Германияда ўйинни назорат қилиш, кўрган учрашувларимиз орасида энг юқори даражада. Бу энди иккинчи тур. Ҳали яна ўйинлар темпи ошади. Европа чемпионати қизиқарли ўтяпти”, - деди Алиқулов.