Асрор Ғофуров "Андижон"га қандай келиб қолди?

Беш йил давомида Туркия чемпионатида тўп суриб илк бор Ўзбекистон чемпионатига қайтган Асрор Ғофуровни билсангиз керак. Ярим ҳимоячи ушбу мавсумдан бошлаб «Андижон» жамоаси шарафини ҳимоя қилмоқда. У ўтказилган иккита беллашувда асосий таркибда иштирок этди. «Қўқон-1912»га қарши беллашувдан сўнг Туркиядан қайтиб келган ўйинчи билан суҳбатда бўлдик.

- Илк бор водий дербисида иштирок этдингиз. Таассуротларингиз қандай?

- Таассуротлар яхши. Ўйин мана шундай қийин бўлишини билардик. Шунга қараб тайёргарлик кўрдик. Биз учрашувдан олдин ҳам футболчилар билан ўзаро гаплашганимизда оғир бўлишини, аммо сўнгги дақиқагача курашишимизга келишгандик. Барибир ўйин давомида биз устунроқ бўлдик. Ҳакам эса урган голимизни ҳисобламади. Ўша пайтда офсайд йўқ эди. Рақиб дарвозаси томон пенальти белгиламади. Менимча, ўйинимиз билан ёмон таассурот қолдирмадик. Муҳими, мухлисларга ёққан бўлса бўлди. Эшитишимча, ишқибозлар ўйин ҳақида яхши гапларни айтишяпти. Чиндан ҳам водий дербиси айтганларича бор экан. Бундаги ўйин, кураш ва кескин юқори даражада. Агар бу ўйин Қўқон ёки Андижонда ўтказилганида стадион мухлислар билан тўлиб-тошарди. Лекин бу сафарги водий дербиси бетараф майдонда ўтказилгани учун стадионни мухлислар билан тўлди дея олмайман. Чунки мен бунгача дербиларнинг ўйинларини ва расмларини кўрганимда стадионларда бўш жойлар бўлмасди. Агарда бу ўйинни «Спорт» телеканалида тўғридан-тўғри олиб беришганида бошқа мухлислар учун ҳам янада қизиқарли бўларди. Лекин нимагадир телевизорда тўғридан-тўғри эфирга узатилмади. Кейин ўйиндан сўнг эфирга беришади дейишди, аммо яна кўрсатишмади. Ҳа, майли, энди биз «Локомотив» билан ўйинга тайёргарлик кўряпмиз.

- Туркия футболида кўплаб дербиларни кўргансиз. Улар билан ўзимиздаги дербиларни солиштириб кўрдингизми?

- У ерда ҳам дербига қизиқиш катта. Тўғриси, Туркияда фанатизм бошқачароқ. Туркия футбол федерацияси эса ишқибозларга кўплаб ҳуқуқларни берган. Масалан, ўйин пайтида мухлислар оловли буюмлар ёки тутатадиган нарсалардан фойдаланишлари мумкин. Аммо катта эркинлик берилиши ҳам яхши эмас. Чунки ўйин пайтида мухлислар тартибсизликларни ҳам келтириб чиқаришлари мумкин. Барибир у ерда дербилар бошқачароқ бўлади. Лекин Ўзбекистонда ҳам мухлисларнинг жонкуярлигини кўриб қойил қолдим. Фарғонадаги дербида иккала жамоанинг ишқибозлари 90 дақиқа давомида тиним билишмади. Туркияда баскетбол, волейбол, кураш ёки боксга унчалик қизиқишмайди. Ҳамма фақат футбол кўришни хоҳлайди. Барибир Ўзбекистондаги биринчи дербидаги ўйиндан қониқдим. Бизни ҳали олдинда яна бошқа қизиқарли дербилар ҳам кутиб турибди.

- Туркияда ўйнаб юрган чоғингизда Ўзбекистондан ҳеч ким хизматларимга қизиқмаяпти дегандингиз. Айтингчи, «Андижон» жамоасига ўтишингиз жараёни қандай юз берди?

- Тўғрисини айтсам, «Андижон»га ўтишим Шуҳрат Раҳмонқулов орқали ҳал бўлди. Уни яхши билсангиз керак, Наманган футболида катта рол ўйнаган. Раҳмонқулов менинг биринчи устозим бўлади. Футболга Шуҳрат ака орқали кириб келганман. У киши билан гаплашганимда Ўзбекистондан вариантлар бор, ўзимизга қайтиб ўйнаб кўргин, балки терма жамоада тўп суришга имкониятинг бўлар, ўзингни кўрсат деганидан кейин устозимнинг гапини икки қилишни истамадим. Устоз барибир шогирдига нотўғри йўлни кўрсатмайди. Ўзбекистон футболида катта ўзгаришлар бўлаётганини, жамоалар ҳамда футболчиларни қўллаб-қувватлаётгани ҳақида кўп айтди. Вақти келиб она ватанимга қайтиб тўп суришимни хохлардим ва ўша кун етиб келди.

- Олдингизда «Андижон»дан бошқа таклиф ҳам бормиди?

- Менга «Андижон»дан ташқари ҳам бошқа таклифлар бор эди. Лекин устозим водийда ўйнагани учун сен ҳам водийда ўйнагинг, у ерда халқ футболни севади. Шу боис «Андижон»да ўйнашимни айтди.

- Ўзбекистонлик бўлсангизда Туркияда беш йил ўйнаб келдингиз ва фаолиятингизда илк бор чемпионатимизда иштирок этяпсиз…

- Ватан барибир ватан. Сиз бошқа мамлакатдан ўйнасангиз ҳам она юртингизни қумсайверасиз. Бундан кейин ҳам ўз иштирокимизни янада яхшилашга ҳаракат қиламиз. Таассуротларим яхши. Айрим мухлисларимиз ўзбек футболи яхши эмас деб гапиришади. Йўқ, ундай эмас. Ўзбек футболини доим ҳурмат қиламан. Муҳтарам Президентимиз айтганларидек, биздаги футболчилар жайдари йигитлар. Футболчилар майдонга катта хоҳиш ва истак билан тушишяпти. Биз ҳам майдонга қандайдир бошқача «иштаҳа» билан тушяпмиз. Айниқса, Қўқондаги ўйинимиз анча қизиқарли бўлди. Тўғри, натижа нурсиз бўлди, аммо ўйин жанговор руҳда кечди.

- «Андижон» мавсумни иккита дуранг билан бошлади. Сизнингча, натижалар адолатлими?

- Ҳамма жамоа ҳам майдонга ғалаба учун тушади. Лекин биз асосан сафарда ўйнаётганимизни ҳам унутмаслик керак. Навоийда «Қизилқум» билан ўйинда ғалабани қўлдан бой бердик. Иккала учрашувда бизда ғалаба учун имкониятларимиз кўпроқ бўлганди. Ҳозир бизнинг ҳисобимизда икки эмас, олти очко бўлиши керак эди. Балки икки очкони ҳам ололмаслигимиз мумкин эди. Шу сабабли ёмон бошламадик. Таркибимизда иштиёқманд ва кўзи ёниб турадиган футболчилар тўпланган. Ҳамма ўйинчиларимизга ишонаман.

- Ўзбекистоннинг амалдаги уч карра чемпионига қарши ўйинда «Локомотив»га қарши учрашувдан нимани кутяпсиз?

- Мен «Пахтакор»да саккиз йил давомида шуғулланиб, таҳсил олганман. Ойбек Қиличев, Илдар Маматказин ва Дилшод Раҳматуллаев ҳам «Пахтакор»да ўйнашган. Эътибор берсак, таркибимиздаги кўплаб ўйинчилар яхши жамоаларда ўйнашган. Ишонасизми, жамоамизда заррача шубҳа йўқ. Биз майдонга уч очкони кўзлаб тушамиз. Тўғри, «Локомотив» Ўзбекистоннинг уч карра чемпиони ва бизга қийин бўлади. Лекин биз ютқазиш учун ўйнамаймиз.

- «Андижон»да сиз учун таниш футболчилар ҳам борми?

- Албатта. Масалан, «Пахтакор»нинг ўринбосарлар сафида ўйнаганимда Ойбек ака Қиличев асосий таркибда ўйнарди. Илдар Маматказинни ҳам яхши биламан. Фарҳод Мираҳматов ҳам «Пахтакор»да «катта» бўлган. Умуман айтганда, кўпчилигини танийман ва мослашиш қийин бўлмади.

- Туркиядаги фаолиятингиздан ўзингиз учун нима олдингиз?

- Ўйинчи 17, 17 ёки 18 ёшидан бошлаб катта футболга кириб келади. Қайси учун тажрибалироқ бўлади? У доим ҳар учрашувда 90 дақиқадан ўйнаганида тажрибаси ортиб бораверади. Мен ҳар доим ўйнаган жамоаларимда барқарор ва тўлиқ кўринишда ўйнаганман. Шу боис Туркияда ўзимга яраша тажрибали футболчи бўлиб қайтдим деб ўйлайман.

Фикрлар

Фикр қолдириш учун авторизациядан ўтинг!