"Астон Вилла" МЮни мағлуб этиб, 111 йиллик натижани такрорлади

"Астон Вилла" Англия Премьер-лигаси 17-туридан ўрин олган "Манчестер Юнайтед"га қарши баҳсда 2:1 ҳисобида ғалаба қозониб, клубнинг 111 йил олдинги натижасини такрорлади. Бу ҳақда "Опта Sports" хабар бермоқда.

Манбага кўра, Бирмингем жамоаси 1914 йилдан бери биринчи марта барча турнирларда кетма-кет 10 та ўйинда ғалаба қозонган.

Бунгача "Астон Вилла" АПЛда "Борнмут" (4:0), "Лидс Юнайтед" (2:1), "Вулверҳемптон" (1:0), "Брайтон" (4:3), "Арсенал" (2:1), "Вест Ҳем Юнайтед" (3:2) ва Европа Лигасида "Маккаби" Тел-Авив (2:0), "Янг Бойз" (2:1) ва "Базел" (2:1) клубларини мағлуб этганди.

Айни пайтда "Астон Вилла" 36 очко билан АПЛ турнир жадвалида учинчи ўринда бормоқда. Кейинги турда Эмери шогирдлари 27 декабрь куни "Челси" меҳмони бўлади.