Баҳромжон Фозилов: "Қаршимизда ким бўлишидан қатъи назар, ғалаба қозонган ҳолда ватанимиз байроғини баланд кўтаришга ҳаракат қиламиз"

16 июль куни пойтахтимиз Тошкент шаҳрида профессионал бокс оқшоми бўлиб ўтиши эълон қилингани ҳақида хабар берган эдик. Кечанинг асосий жангларидан бирида ўрта вазн тоифасида фаолият олиб бораётган Баҳромжон Фозилов WBА Asiа камари учун аргентина вакили Диего Рамиресга қарши жанг ўтказади. Даставвал, унинг рақиби укриналик Станислав Скороход бўлиши керак эди. Рақиб ўзгаргани ва жангга тайёргарлик қай тарзда олиб борилганини билиш мақсадида Фозиловга саволлар билан мурожаат қилдик.

-Ассалому алайкум. Бўлажак жангингиз олдидан таассуротларингиз билан ўртоқлашсангиз.

-Ассалому алайкум. Рингга қайтишимга ҳам оз муддат қолмоқда. Март ойидаги жангимдан сўнг, яна Тошкентда рингга кўтарилишимдан жуда ҳам хурсандман.

-Даставвал, сизга Украина вакили Станислав Скороход рақиб бўлиши эълон қилинган эди. Ўзгаришга нима сабаб бўлди?

-Ҳозирда Украинада давом этаётган сиёсий вазият туфайли рақиб кела олмайдиган бўлди. Шунга қарамасдан, менежерлар қисқа фурсатда яхши рақиб билан уни ўрнини тўлдира олишди. Ҳозирги аргентиналик рақибим ҳам 30 дан ортиқ жанг ўтказган тажрибали боксчи.

-Сиз асосан машғулотларда Скороходга қарши тактика танлаб ишлагансиз. Бу ўзгариш сизнинг услубингизга қанчалик таъсир қилади?

-Албатта, машғулотларимизда биринчи рақибнинг услубига қарши услуб танлаш нуқтаи назаридан ишлаган эдик. Аргентиналик рақиб эса унга тескари услубли боксчи экан. Асосий зарбаларини чап қўл билан йўллайди. Лекин ҳар иккаласи ҳам қарши ҳужумда ҳаракат қилади. Шу нуқтаи назардан, биз янги рақибимизни ҳам иложи борича ўрганиб, унга қарши тактика қўллашга ҳаракат қиламиз. Спортчи ҳар қандай вазиятга тайёр туриши керак ва бу муваффақиятга эришишнинг бир қисми ҳисобланади.

- Ушбу бахсда сизга чиройли ғалаба тилаймиз.

- Эътибор учун катта раҳмат. Қаршимизда ким бўлишидан қатъи назар, ғалаба қозонган ҳолда ватанимиз байроғини баланд кўтаришга ҳаракат қиламиз.

16 июль кунги профессионал бокс оқшоми Зўр ТВ каналидаги "Renaissance Hall" аренасида бўлиб ўтади.

Баҳромжон Фозилов 1997 йилда Фарғона вилояти Бешариқ туманида таваллуд топган. Рапқон бокс мактаби тарбияланувчиси ҳисобланган Фозилов илк бокс сир-асрорларини мураббий Олим Алиқуловдан ўрганган. Фозилов катталар ўртасида Ўзбекистон чемпионати бронза медалчиси, қолаверса, бир қанча халқаро турнирлар ғолиб ва совриндори бўлган. Ҳозирда Зоиржон Усмонов қўл остида машғулотлар ўтказиб келаётган Баҳромжон профессионал бокснинг ўрта вазн тоифасида (72 кг) рингга кўтарилмоқда. У 14 март куни Тошкент шаҳрида ташкил этилган бокс оқшомида Озарбайжон вакили Али Маммедовни муддатидан олдин мағлуб этган эди.

Чипталарни қуйидаги ҳавола орқали сотиб олишингиз мумкин.