“Барса” ҳимоячиси ўзини қийнаган “Реал”даги рақиби номини айтди

“Барселона”нинг иқтидорли ёш ўйинчиларидан Пау Кубарси ашаддий рақиб – “Реал”нинг қайси футболчисига қарши ҳимояланиш қийин эканини ҳақидаги саволга жавоб қайтарди.

Ундан марказий ҳимоячи сифатида ҳужумчи Килиан Мбаппе ёки майдон ичкарисидан кутилмаганда ҳужум қиладиган Жуд Беллигемдан қай бирига қарши ўйнаш қийинлигини сўрашди.

- Иккисига қарши ўйнаш қийин. Мбаппе серҳаракат, майдон бўйлаб ҳужум қилади ва ўта тезкор. Беллингем сен кутмаган позициядан ҳамла қилади. Мен учун Мбаппе тезлиги эвазига хавфлироқ, деб биламан. У тўпга биринчи тегишидаёқ ҳужумни гол билан якунлаш имконига эга, - деди Пау Кубарси.

Эслатиб ўтамиз, янги мавсумнинг биринчи “эл-класико”си 26 октябрь куни бўлиб ўтади. Ла Лиганинг 10-турида “Реал” Мадриддаги “Сантьяго Бернабеу” стадионида амалдаги чемпион “Барселона”ни қабул қилади.