“Барса” катта трансферга қўл урмоқда

“Байер”га илк бор чемпионликни тақдим этган футболчилардан бири Жереми Фримпонг келаси мавсумни “Барселона”да бошлаши мумкин.

Sport.es сайтининг ёзишича, нидерландиялик ҳимоячига “Барселона”нинг янги бош мурабби Ханс-Дитер Флик шахсан қизиқиш билдирмоқда.

Маълумотларга қараганда, каталонияликлар 23 ёшли ўйинчини сўраб, леверкузенликларга мурожаат қилган. Бироқ Бундеслига чемпиони биринчи таклифни рад этди.

Жереми Фримпонгнинг ўзи ҳали келажаги бўйича бир қарорга келгани йўқ. У бор эътиборини Нидерландия терма жамоаси сафида Европа чемпионатида муваффақиятли иштирок этишга қаратган.

Фримпонг якунланган мавсумда 47 та  учрашувда қатнашиб, 14 та гол ва 12 та ассист муаллифи бўлди. 2028 йилнинг ярмигача амал қиладиган шартномага эга ҳимоячи 50 миллион еврога баҳоланмоқда.