“Барса” “Сити” юлдузини олмоқчи. “Шаҳарликлар” трансферга рози

Испания чемпионлигини қўлга киритган “Барселона” келаси мавсум олдидан ҳужум чизиғини кучайтиришга қарор қилган.

Каталония клуби “Манчестер Сити”да асосий таркиб ўйинчисига айлана олмаётган Умар Мармуш учун курашга қўшилганидан кейин трансфер бўйича фаворитга айланди.

Мисрлик футболчи “шаҳарликлар” сафини тарк этишга интилмаётган бўлса-да, у кўпроқ ўйин амалиётига эга бўлишни истамоқда. Бу ҳақда Caught Offside хабар берди.

Манба маълумотига кўра, “Манчестер Сити” 27 ёшли ҳужумчини 60-65 миллион евро миқдорида таклиф тушса, сотишга тайёр.

Каталонияликлар Мармушни ёзда жамоани тарк этадиган Роберт Левандовскининг эҳтимолий ўринбосари сифатида кўрмоқда.

Аввалроқ мисрлик футболчига “Тоттенхэм” ва “Астон Вилла” ҳам қизиқиш билдираётгани ҳақида хабарлар тарқалганди.

Жорий мавсумда Мармуш барча турнирларда 34 та ўйинда қатнашиб, саккизта гол ва учта голли узатма муаллифи бўлди.

Футболчининг клуб билан амалдаги шартномаси 2029 йил ёзигача мўлжалланган. Transfermarkt портали маълумотига кўра, футболчининг бозор қиймати 60 миллион еврога тенг.