“Барса”га икки суперҳимоячи керак

Испаниянинг амалдаги чемпиони “Барселона” яқин тўрт-беш йил давомида жамоани кучайтиришга қодир марказий ҳимоячиларни олиш вариантларини кўриб чиқмоқда.

Каталонияликлар учун энг муҳим номзодлар “Манчестер Сити”да барқарор ўйнаётган Йошко Гвардиол ва “Интер”нинг кейинги йиллардаги етакчи ҳимоячисига айланган Алессандро Бастони бўлиб турибди.

Бу ҳақда Mundo Deportivo хабар берди.

Унга кўра, Каталония суперклуби молиявий муаммоларини ҳал этгач, катта эҳтимол билан келаси ёзда ушбу футболчиларни харид қилиш ҳақида жиддий ўйлаб кўриши мумкин. Таъкидланишича, “Барселона” Гвардиол ва Бастони мисолида ҳам ҳимоя марказида, ҳам чап қанотда ўйнай оладиган, тўпни назорат қилишни биладиган ва катта ўйинлар тажрибасига эга ҳимоячиларни кўрмоқда.

Ушбу футболчилар “Барселона” билан шартномаси 2026 йилнинг ёзида якунланадиган Андреас Кристенсен ва психологик муаммоларга дуч келган Рональд Араухонинг ўрнини босиши кутиляпти.