"Барселона" Флик қўл остидаги илк совринини ютди

"Барселона" Испания Суперкубогини ажойиб ўтказди. Жамоа дастлаб "Атлетик"ни таслим этган бўлса, финалда "Реал"ни аяб ўтирмади...

Учрашувда Килиан Мбаппе ҳисобни очганди, лекин Ламин Ямалнинг жавоб кўп куттирмади. Ёш вингер тезкор рейди билан имкониятларни тенглаштириб қўйди. Ундан кейин эса Роберт Левандовски жамоасини олдинга олиб чиққан бўлса, Рафиньянинг дубли ва Алехандро Бальденинг голлари эвазига ҳисоб 5:1 кўринишига келди. Баҳснинг 56-дақиқасида Войцех Шенсни қизил карточка олиб майдонни тарк этди, орадан 4 дақиқа ўтиб Родриго жарима зарбасидан супер гол урди. 

Шу тариқа, "Барса" 5:2 ҳисобида зафар қучиб, Флик қўл остидаги илк совринни ютди. Клуб 15-бор Испания Суперкубогига эга чиқмоқда.