"Барселона" УЕФАга "Атлетико" билан ўйинлардаги ҳакамлик юзасидан шикоят қилди

"Барселона" УЕФАга Мадриднинг "Атлетико" клубига қарши Чемпионлар лигаси чорак финали доирасидаги ўйинларда ҳакамлик фаолияти юзасидан расмий шикоят юборди.

Каталония клуби баёнотида қайд этилишича, икки ўйин давомида қабул қилинган бир қатор ҳакамлик қарорлари ўйин қоидаларига мос бўлмаган ва ВАР тизимининг айрим муҳим эпизодларга етарлича аралаша олмагани натижага таъсир қилган.

Клуб фикрича, ушбу хатолар йиғиндиси қарама-қаршилик натижасига бевосита таъсир кўрсатган ва "Барселона" учун катта спорт ҳамда молиявий йўқотишларга сабаб бўлган.

Шунингдек, каталонияликлар бу мурожаат аввал ҳам УЕФАга йўлланган шикоятларнинг давоми эканини билдириб, ҳакамлик тизимини янада такомиллаштириш, қоидаларни адолатли ва шаффоф қўллаш бўйича ҳамкорликка тайёр эканини маълум қилган.

Маълумот учун, "кўк-анорранглилар" "матрасчилар"га  икки ўйин натижасига кўра, 3:2 ҳисобида мағлуб бўлиб, мусобақани тарк этди.