“Барселона” Холанд трансфери бўйича бир қарорга келди

“Манчестер Сити” ҳужумчиси Эрлинг Холанд “Барселона”нинг трансфер нишонлари рўйхатига киритилганига анча бўлди. Бироқ бу жуда мураккаб жараён ҳисобланади.

Журналист Серхио Гонсалес маълумотига кўра, Каталония суперклуби норвегиялик футболчининг трансферига қўл уришга шошилмайдиган бўлди. Бунинг ўзига яраша сабаблари бор.

Ҳозирча бу савдо имконсиз, ҳатто Хосеп Гвардиола “Манчестер Сити”ни тарк этган тақдирда ҳам, режани амалга ошириш ўта қийин бўлади.

“Барселона” президенти Жоан Лапорта ҳеч бир ҳужумчи учун бирданига 100 миллион евродан ортиқ маблағ тўламайди. Каталонияликлар тўловни бўлиб-бўлиб амалга ошириладиган трансферни афзал кўрмоқда.

Эрлинг Холанд 2022 йили Дортмунднинг “Боруссия” клубидан “Манчестер Сити”га 60 миллион евро эвазига ўтган эди. Унинг шартномаси 2034 йилнинг 30 июнигача амал қилади.

Бугунги кунда Холанднинг трансфер бозоридаги қиймати 200 миллион евро атрофида баҳоланмоқда. Қолаверса, Эрлинг Европада энг катта маош оладиган футболчи ҳисобланади ва унинг хизмат ҳақи “Барселона”га оғирлик қилиши мумкин.

Жорий мавсумда ҳужумчи "шаҳарликлар" сафида барча мусобақаларда 52 та ўйин ўтказиб, 38 та гол урди ва тўққизта голли пас берди.