“Барселона” янги бош мураббий танлади

Хави Эрнандес жорий мавсум якунланиши билан “Барселона” бош мураббийлигидан кетишини эълон қилган. Унинг танловини клуб раҳбарияти ҳам қабул қилди.

Айни пайтда каталонияликлар жамоани кейинги мавсумга тайёрлайдиган янги бош мураббий қидирмоқда.

Рўйхатда бир неча машҳур мутахассислар бор. Бироқ, каталонияликлар таклиф қилмоқчи бўлаётганлардан Луис Энрике ва Микель Артета ПСЖ ва “Арсенал”даги ишини ташлаб, “Барселона”га кўчиб ўтолмайди.

Юрген Клопп “Ливерпуль”ни топширганидан кейин маълум муддат  ҳордиқ чиқармоқчи ва ҳеч қандай таклифларни кўриб чиқмайди.

Германиялик мутахассис Ханс-Дитер Флик “Барселона”га ўз хизматини таклиф қилганди. Бироқ бу номзод раҳбариятни қизиқтиргани йўқ.

Сўнгги маълумотларга қараганда, “Барселона” хўжайини Жоан Лапорта  “Брайтон”нни бошқараётган Роберто Де Дзербига жиддий қизиқиш билдирмоқда. “Манчестер Сити” бош мураббийи Хосеп Гвардиола ҳам каталонияликларга италиялик мураббийни таклиф қилишни маслаҳат берди.

Каталония клуби раҳбарияти Роберто Де Дзербининг тактик қарашларини клубникига мос, деган хулосага келган.