“Барселона”га гол уришдан тўхтамаётган ҳужумчи хизматини таклиф қилишди

“Барселона” ўткир ҳужумчига эҳтиёж сезмоқда. Футбол агентлари каталонияликларга “Байер” шарафини ҳимоя қилаётган Патрик Шик хизматини таклиф қилишди.

25 ёшли чех ҳужумчиси 2020 йили “Рома”дан 26,5 миллион еврога трансфер қилинганидан кейин ўйини очилиб кетди.

Патрик Шик жорий мавсумда сермаҳсул ўйин кўрсатяпти. У бундеслигада 16 та учрашувда қатнашиб, рақиблар дарвозасига 18 та тўп киритди ва жамоадошларига учта голли узатма оширди.

Бу футболчининг леверкузенликлар билан келишуви 2025 йилнинг ёзигача давом этади. “Барселона” уни олмоқчи бўлса, 40 миллион евро миқдорида харажат қилишига тўғри келади.