Бахтиёр Ҳамидуллаев: "Футболда омад кучлиларга кулиб боқади"

Андижон футболининг афсоналаридан бири Бахтиёр Ҳамидуллаевни ҳам куни кеча “Андижон” клубининг Қаршида “Насаф” устидан эришган ғалабаси бефарқ қолдиргани йўқ.

Ўзаро ўйинларда бу “Андижон”нинг “Насаф” майдонидаги иккинчи ғалабасидир. Дастлаб 1999 йилги мавсумда Қаршида жамоамиз 1:2 ҳисобида ғалаба қозонган. Ўшанда тўпурар ҳужумчи Бахтиёр Ҳамидуллаевнинг голларда улуши катта бўлган. Биринчиси ўзида пенальти ишлаган ва иккинчисида ўзи гол урган.

Мухлислар орасида “Батигол” номи билан машҳур бўлган Ҳамидуллаев “Андижон”нинг “Насаф” майдонидаги ғалабаси ва 1999 йилда қўлга киритилган илк муваффақият борасида фикрларини билдириб ўтди.  

“1999 йилдаги ўйин ҳозиргидек эсимда. У пайтда шаҳар ҳокими Абдуллажон Собиров бўларди ва жамоамизга ўзи қарарди. Учрашувдан бир кун олдин Андижондан Қаршига учганмиз ва бизни аэропортда ўзи кузатиб, агар ютиб келсанглар, ғалабани ўзим сизлар билан бирга нишонлайман деб ваъда берган. Ютиб келганимиздан кейин сўзини устидан чиқиб, бизни ғалаба билан табриклаб, бирга нишонлаган. Ўша пайтдаги “Насаф” ҳам кучли эди ва ҳозиргиси ҳам. У ердан 3-4 та футболчи кетса ҳам ҳеч қачон жамоа пасайиб қолмайди. Эсимда ўша учрашувда пенальти ишлаганман ва буни Захриддин Акбаров голга айлантирган. Ўзим ҳам тепсам бўларди, аммо унга берганман. Иккинчи голни эса мен киритганман.

Куни кеча бўлиб ўтган “Насаф” – “Андижон” учрашувига келсак, бош мураббий Александр Хомяковнинг матбуот анжуманидаги фикрларини ўқидим. Омад кулиб боққанини айтди. Жамоа шу кетишда давом этса, ҳар доимгидек пастки ўринларда эмас, балки юқорироқ поғоналарни эгаллашга қодир.

Ростини айтсам, “Андижон”нинг “Насаф” майдонидаги ғалабасини ҳеч ким кутмаган бўлса керак. Фақатгина “Андижон” мухлисларигина ғалабага охиригача ишонишади. Барибир футболда кучли клубга омад кулиб боқади. Демак, Қаршидаги ўйинда “Андижон” кучлироқ бўлгани учун ҳам уларга омад келган”, - деди Ҳамидуллаев.

“Андижон” матбуот хизмати.