Беллингем атиги тўрт ўйинда буюклар қаторига қўшилди

“Реал”нинг янги футболчиси Жуд Беллингем жорий мавсумда жамоа жонига аро кирмоқда. Англиялик ёш ўйинчи Испания чемпионатининг дастлабки тўртта ўйинида кетма-кет тўп киритиб, жамоасининг ғалабаларини таъминлаб келяпти.

Ла Лиганинг тўртинчи турида “Реал” ўз майдонида “Хетафе”ни қийинчилик билан 2:1 ҳисобида мағлуб этди. Ғалаба тўпини сўнгги дақиқаларда айнан Беллингем киритди.

Squawka нашрининг хабар беришича, Жуд Беллингем XXI асрда Ла Лиганинг дастлабки тўртта учрашувида гол урган тўртинчи футболчи бўлди.

Бунгача Испания юқори дивизионида Златан Иброҳимович (2009 йилда), Криштиану Роналду (2009 йилда) ва  Сеск Фабрегас (2011 йилда) дастлабки тўртта учрашувда узлуксиз рақиблар дарвозасини ишғол қилган.