Бентунинг Жаҳон чемпионатидаги статистикаси қандай?

Ўзбекистон терма жамоасини бошқариши кутилаётган португалиялик мураббий Паулу Бенту бундан олдин икки марта Жаҳон чемпионатида ишлаган. 2014 йили мутахассис Португалия терма жамоасини Бразилияга олиб борганди. 

Ушбу мундиал португалиялик мухлисларнинг ҳафсаласини пир қилган. Сабаби, 2012 йили жамоа Евро'да ярим финалгача етиб борганди. Шудай экан, кўпчилик Португалияни Жаҳон чемпионатида яхши иштирок этишини кутишган. Биринчи баҳсда Бенту шогирдлари 2:1 ҳисобида Ганани мағлуб қилди. Аммо иккинчи турда жамоа АҚШ билан кутилмаганда дуранг ўйнади. 

3-турда Португалияни Йоахим Лёв бошқарувидаги Германия кутиб турар эди. Ўша турнир ғолиби бўлган немислар 4 та гол уришади, Мюллердан хет-трик. Роналду ва унинг дўстлари эса гуруҳда 3-ўрин билан қолиб кетади. Криштианунинг ўзи эса голсиз чемпионатни тарк этади. 

Орадан йиллар ўтиб, Бенту яна Жаҳон чемпионатида иштирок этди, бу сафар Жанубий Корея билан. 2018 йили ишни бошлаган португал 2022 йили Қатарда бўлиб ўтган мундиалга жамоани олиб чиқди. Биринчи турда кореяликлар Уругвай билан 0:0 ҳисобида дуранг ўйнаган бўлса, иккинчи турда Ганага 2:3 ҳисобида мағлуб бўлишди. 

Жанубий Корея 3-турда Португалияни мағлуб этиб, гуруҳдан чиқишга муваффақ бўлди. Ғалаба голини эса сўнгги дақиқаларда Хванг Чханг уриб кетганди. Аммо нимчорак финалда Бразилия Кореяни аяб ўтирмади. Тите шогирдлари 4:1 ҳисобида зафар қучиб, чорак финалга йўл олишган. 

Шундай қилиб, Бентунинг Жаҳон чемпионатидаги умумий статистикаси: 7 та ўйин, 2 та ғалаба, 2 та дуранг ва 3 та мағлубият.