Бир “бўри”га тўртта гранд харидор

Бразилия терма жамоаси ярим ҳимоячиси Жоао Гомес фаолиятини Англиянинг гранд клубларида давом эттириши мумкин.

“Вулверхэмптон”да ўйнаётган футболчини “Манчестер Юнайтед”, “Ливерпуль”, “Арсенал” ва “Тоттенхэм” ўз сафига қўшиб олишга ҳаракат қилмоқда.

“Бўрилар” ўз футболчиси билан хайрлашишга шошилаётгани йўқ. Улар яхши таклиф бўлсагина Гомесни қўйиб юбориши мумкин.

Transfermarkt портали 23 ёшли футболчини 35 миллион еврога баҳолаган.

Жоао Гомеснинг “Вулверхэмптон” билан имзолаган шартномаси 2028 йилнинг ёзигача давом этади. Шу боис, харидорлар уни фақатгина талаб қилинган миқдордаги бадал пулини тўлаш орқали қўлга киритиши мумкин.

Таянч ҳудудда ўйнайдиган Гомес “Фламенго” жамоаси тарбияланувчиси ҳисобланади. “Бўрилар” уни ўтган мавсум 18,7 миллион еврога трансфер қилган эди. Истеъдодли ўйинчи дебют мавсумидаёқ  гранд клублар эътиборини қозонди.