Бир қатор легионерларимиз энди битта чемпионатда!

Қўшни Тожикистон чемпионатида ҳам иккинчи давра баҳслари давом этмоқда. Биздаги каби у ерда ҳам ёзги трансфер вақтида Тожикистон олий лигасидаги клублар ўз таркибларида сезиларли селекция ишларини амалга оширдилар. Биз учун эътиборли томони шундаки, тожик клублари яна бир қатор ўзбек футболчиларининг трансферларини эълон қилди. Сизу, бизга таниш бўлган ўйинчилар эндиликда Тожикистон чемпионатида. Кимдир илк бор кўчиб ўтган бўлса, бошқалари клубини ўзгартирганига гувоҳ бўлишимиз мумкин.

Суперлига ва про лигада бир қатор клублар шарафини ҳимоя қилган ва бунгача Индонезиянинг “Малут Юнайтед” жамоасида тўп сурган ярим ҳимоячи Муҳаммад Исаев Душанбенинг ЦСКАсидан тушган таклифни қабул қилди. Маълумот учун, Исаев бир неча йил илгари Тожикистоннинг етакчи клуби - "Истиқлол"да ярим мавсум ўйнаган. Осиё Чемпионлар лигасида ҳам дебютини ўтказган ва гол ҳам урган.

Шунингдек, ЦСКА сафига “Қўқон-1912”дан ҳужумкор ярим ҳимоячи Ислом Исоқжонов ҳам қўшиб олинган. ЦСКА клуби Тожикистон чемпионатида “Истиқлол”дан кейин 26 очко билан 2-ўринни банд этиб турибди. Маълумот учун, “Истиқлол” шу пайтгача 14 та ўйиннинг барчасида 100 фоизлик натижа кўрсатиб, ҳамма учрашувларни ютиб келяпти, бирорта мағлубият тугул, ҳатто дуранг ҳам йўқ. ЦСКА эса ҳамюртларимиз ёрдамида натижаларни янада яхшилаш илинжида.

Шунингдек, бир неча мавсум “Бунёдкор” шарафини ҳимоя қилган ва жорий йил ярим мавсум “Металлург”да ўйнаган асли тожикистонлик ҳимоячи Даврон Эргашев яна юртига қайтди. У “Хўжанд” клуби билан шартнома имзолади. Ишқибозларимиз эса бу футболчини яхши эслаб қолишган.

Тожикистоннинг яна бир клуби “Куктош” ёзда икки нафар ҳамюртимизни жалб қилди. Булар – биринчи лига аъзоси – “Жиззах” сафида тўп сурган Жаҳонгир Аламов ҳамда “Пахтакор-79”дан Ҳасанбой Қаҳҳоров. Легионерга айланган ўйинчиларимиз учун бу ўзларини кўрсатишга қўшимча имконият. Боз устига “Куктош” мусобақа жадвалида 5 очко билан охирги ўринда. Ёзда эса клуб таркибини кучайтиришга ҳаракат қилди ва футболчиларимиздан ҳам умиди катта. Қолаверса, “Эсхата” клуби легионеримиз Санжар Рихсибоевни яна ортга қайтарди. Унгача ҳам футболчимиз мазкур жамоада тўп суриб, кейин орада пуаза олганди. Иккинчи даврадан эса Санжар “Эсхата”нинг “заявка”сига киритилди.

Бир қанча клубларида ўйнаб чиққан ва охирги пайтда “Хоразм”да тўп сурган ҳужумчи Мўмин Мелиевнинг чемпионатимизда у қадар ишлари юришмаётганди. Бу сафар эса омадини синаб кўриш мақсадида Тожикистон чемпионатига йўл олди. Унга Нўъмон Ҳасанов бош мураббийлик қилаётган “Истаравшан” таклиф билан чиқди ва бу чақирувни футболчи ижобий қабул қилди. Балки у ерда Мўминнинг ишлари юришиб кетар.

Шуҳратбек Жўраев.