Бизга Бензема керак эмас!

Ўтган ёз “Реал”дан Саудия Арабистонининг “Ал-Иттиҳод” жамоасига кўчиб ўтган Карим Бензема ярим йилдан кейин Европага қайтмоқчи бўлаётгани ҳақида хабарлар кўпайиб қолди.

Яқинда Франция чемпиони ПСЖ 35 ёшли форвардни ўз сафига қўшиб олмоқчи экани ҳақида ҳам маълумотлар тарқатилганди.

Transfer News Live нашрига кўра, ПСЖ раҳбарияти Бенземани трансфер қилиш ғоясидан воз кечган.

Бошида клуб президенти Нассер Ал-Хелаифий Каримни жорий мавсум охиригача ижарага олиш фикрини ўртага ташлаган эди. Муҳокамалардан сўнг парижликлар бу трансферга қўл урмасликка қарор қилди.

Чунки айни пайтда ПСЖда ҳужум чизиғини кучайтиришга эҳтиёж йўқ. Жамоага қанот ҳимоячиси ва майдон марказида ишончли ўйнай оладиган ярим ҳимоячи керак.