Бизга ўт, еврода миллионер бўласан!

Италиянинг “Ювентус” клуби португалиялик ярим ҳимоячи Бернарду Силвага 2028 йилнинг ёзигача мўлжалланган катта шартнома таклиф қилишга тайёр.

Бу ҳақда инсайдер Николо Скира хабар берди. У аввалроқ ҳам туринликларнинг футболчига қизиқиши ҳақида маълумот тарқатган эди.

Манбага кўра, янги шартномада ҳамкорликни яна бир мавсумга – 2029 йилнинг ёзигача узайтириш имконияти ҳам кўзда тутилган.

31 ёшли футболчининг маоши йилига 8 миллион еврони ташкил қилиши айтилмоқда. Шу сумманинг 2 миллион еврогача қисми бонуслардан иборат бўлади:

- 1 миллион евро – самарадорлик учун;
- 1 миллион евро – “Ювентус” УЕФА Чемпионлар лигасига чиқса берилади.

Бернарду Силванинг “Манчестер Сити” билан шартномаси 2026 йил ёзигача амал қилади. Шу боис у янги клубига эркин агент сифатида, компенсация пулисиз ўтиши мумкин.