Бокс. Ўзбекистонлик Руслан Абдуллаев жаҳон чемпионатини ғалаба билан бошлади

Тошкентдаги бокс бўйича жаҳон чемпионати давом этади. Иккинчи май санасида 3 нафар ҳамюртимиз рингга чиқади.

Беллашувлар соат 13:00дан бошлаб старт олади. Дастлаб -63,5 кг вазн тоифасида Руслан Абдуллаев Пуэрто-Рико вакили Мануэль Фебусга қарши рингга чиқади. Жанг тахминан 13:55дан сўнг бошланади. 

-86 кг вазн тоифасидаги Шоҳжаҳон Абдуллаев Қирғиз Республикасидан келган Адилбек Уулу билан беллашади. Жанг таҳминан 15:40дан сўнг старт олади.

-80 кглилар баҳсида Жасурбек Йўлдошевга жазоирлик Йоунус Немоучи рақиблик қилади. Жанг таҳминан 21:00дан сўнг бошланади.

--------------------------------------------------------------------------------------------------------------------------------

Руслан Абдуллаев ва Мануэль Фебус рингга чиқиб келмоқда. Ҳамюртимиз кўк либосда, унинг рақиби эса қизил формада ҳаракат қилади.

Биринчи раунд бошланди.

Ҳамюртимиз илк сонияларда рақибининг қорин қисмига кетма-кет зарбалар йўллади. Мануэль Фебус ҳам жеб зарбаларини бермоқда. Руслан Абдуллаев рингда рақибини таъқиб қилмоқда. Иккилик зарбаларини берди. Фебус ҳимояланишга ўтди. Боксчилар клинчга кирди. Вакилимиз учлик зарбаларини ўтказа олди.

Биринчи раунд якунланди. Ҳакамлар 0:5 ҳисобида Русланнинг устунлигини қайд этишди.

Иккинчи раунд бошланди.

Ҳамюртимиз анча кучли зарбалар бермоқда. Аммо унинг рақиби Русланнинг зарбаларига туриб бера олмоқда, ҳозирча, албатта. Ниҳоят Мануэль Фебус мувозанатни йўқотмоқда. Яна иккилик ва учлик зарбалари йўлланди Руслан томонидан. Клинч ҳолати. Ҳисоб очилди... Боксчи жангни давом эттиришини билдирди. Жанг давом этмоқда. Иккинчи раунд охирида икки боксчининг зарбалари ҳавога учди...

Иккинчи раунд якунланди. Ҳакамлар яна 0:5 ҳисобида Русланнинг устунлигини қайд этишди.

Учинчи раунд бошланди.

Руслан Абдуллаев зарбалар бермоқда. Иккилик зарбалари анча кучли чиқмоқда. Клинч. Клинчда ҳам вакилимиз зарбаларини ўтказа олмоқда. Кўринишидан Русланнинг рақиби жанг тезроқ тугашига қарши эмас. Ҳамюртимизнинг жисмоний ҳолати анча яхши экани кўринмоқда. Жеб зарбалар йўлланмоқда икки боксчи томонидан. Устунлик Руслан томонида. Раунд охирида Фебус бироз жонланди. Аммо кеч бўлганди...

Учинчи раунд якунланди. Ҳакамлар яна 0:5 ҳисобида Русланнинг устунлигини қайд этишди. Якуний ҳисоб 0:5. Руслан Абдуллаев ғалаба қозонди.