Бўлди, “Реал” Винисиусни январда сотади!

“Реал” январь ойида очиладиган қишки трансферлар ойнаси даврида қимматбаҳо ўйинчиси Винисиус Жуниорни сотиб юборишга тайёргарлик кўрмоқда.

Бу ҳақда Испаниядаги нуфузли манба Sport.es сайти хабар тарқатди.

Манбага кўра, “Қироллик клуби” раҳбарияти бразилиялик юлдуз билан янги шартнома тузиш бўйича давом этаётган музокараларнинг натижасидан қониқмаяпти. Гап шундаки, Винисиус клуб хўжайинларидан янги битим бўйича маоши жамоа етакчиси Килиан Мбаппеникидан кам бўлмайлигини талаб қиляпти.

“Реал” раҳбарияти унинг талабини қондирмоқчи эмас. Улар бу ҳолат клубнинг ички муҳитига салбий таъсир қилишидан хавотир оляпти.  Қолаверса, “Реал” бошқарув сиёсатида футболчиларнинг маошлари ўртасида кескин фарқ бўлишига йўл қўйилмайди.

Вазият мураккаблашиб бораётганини инобатга олган “Қироллик клуби” мутасаддилари Винисиус Жуниорни сотиб юбориш вариантини маъқуллади.

Transfermarkt портали мадридликлар билан амалдаги шартномаси 2027 йилнинг 30 июнигача давом этадиган футболчини 170 миллион еврога баҳоламоқда.