"Бу таклиф мен учун сюрприз бўлди" ёхуд "Андижон" трансфер ойнаси ёпилиши арафасида қандай легионер билан шартнома тузди?

Трансфер ойнаси ёпилишига оз фурсат қолганида “Андижон” сўнгги харидини амалга оширди. Жамоага албаниялик тажрибали ҳужумчи Рубин Хебай қўшилди ва 2 йиллик шартнома имзоланди. Бу орқали “Андижон” легионерлар лимитидан тўлиқ фойдаланди.

Рубин Хебай бунгача Албания олий лигасида “Теута” клуби шарафини ҳимоя қилган бўлиб, 20 та учрашувда 10 та гол урган. Шунингдек, у Албания U-17, U-19 ва U-21 терма жамоаларида ҳам фаолият олиб борган.

Бизнинг маълумот:

Рубин Хебай

Туғилган санаси: 30.07.1998

Амплуаси: ҳужумчи

Бўйи: 187

Вазни: 70

Тўп сурган клублари: “Влазния” (Албания), “Домжале” (Словения), “Партизани” (Албания), “Ворскла” (Украина), “Шкендия-79” (Македония), “Теута” (Албания).

Расман “Андижон” аъзосига айланган албаниялик легионер янги клубидаги ўзининги илк интервьюсини берди.

- “Андижон” клубига келганимдан хурсандман. Бу мен учун янги чақирув ва янги мамлакат. Мен ҳаммасини кўриб чиқдим, бу бой тарихга эга жамоа экан. Қўлимдан келганича клубга фойда келтиришга ҳаракат қиламан.

- Албаниялик ўйинчи сифатида илк бор юртимизга келдингиз ва айтингчи, бунгача ўзбек футболи ҳақида қандай тушунчага эга эдингиз?

- Биз кабилар ёш авлод вакилларимиз. Шунинг учун ҳали тўлиқ маълумотга эга бўлмаслигим мумкин, аммо Ўзбекистон миллий терма жамоаси ҳақида биламан. Лекин клублари хусусида унчалик билмасдим. Балки ёшлигим учун қандайдир маълумотларга эга бўлмагандирман. Аммо энди шу ерда эканман, барчаси ҳақида тасаввурга эга бўламан.

- “Андижон” клубидан таклифни илк бор эшитганингизда қандай қабул қилдингиз? Сиз учун кутилмаган сюрприз бўлдими?

- Ҳақиқатда мен учун сюрприз бўлди. Бу кутилмаганда юз берди. Ўзинглар ҳам айтиб ўтганларингдек, Албаниядан биринчи футболчи келиши экан. Мен энг зўр сифатларимни кўрсатишга ҳаракат қиламан. Доим ўзимдан ижобий таассурот қолдиришга бор кучимни сарфлайман.

- Стадионда “Андижон” иштирокидаги илк назорат ўйинини кўрдингиз. Сизда қандай таассурот қолдирди?

- Ҳа, биринчи марта кўришим. Барибир кундан-кунга бой маълумотларга эга бўлиб бораман. Бир қатор янги ўйинчилар бор экан. Ўйинни кўриб таассуротларим ўзимга яраша бўлди. Ўйлайманки, борган сари янада кўпроқ ўрганиб бораман.

- Рубин Хебайни келиши андижонлик мухлислар орасида катта реакция келтириб чиқармоқда. Чунки қандай ҳужумчи, нималарга қодир, қабилида қизиқиш билан қарамоқдалар. Бу ердаги мақсадингиз қандай ва клуб ишқибозларига нима деган бўлардингиз?

- Юқорида айтиб ўтганимдек, энг зўр жиҳатларимни, ўйинларимни кўрсатишга ҳаракат қиламан. Эшитдим, мухлислар стадионни тўлдиришар экан. Улар албатта стадионни тўлдиришсин, биз албатта ўз ўйинларимиз ва голларимиз билан хурсанд қилишга интиламиз.