Бу терма жамоада Шомуродов йўқ!

Италияда А Серия ўйинлари якунланмоқда. Чемпионат якунланишига бир тур қолганида деярли барча масалага ойдинлик киритиб бўлинган.

Чемпионликни муддатидан олдин “Наполи” қўлга киритди. Неаполликлар скудеттони 33 йил кутди. Ниҳоят, бу клуб Милан клублари гегемонлигига барҳам берди ва Италия чемпионлигига сазовор бўлиб, мухлислари ишончини оқлади.

“Наполи” билан бирга кейинги мавсумда Чемпионлар лигасида Италия шарафини “Лацио”, “Интер” ва “Милан” ҳимоя қиладиган бўлди.

Элдор Шомуродовнинг асл жамоаси – “Рома” ўтган йили Конференциялар лигасида ғолиб чиққан эди. Бу гал Жозе Моуриньо шогирдлари Европа лигаси финалида пенальтилар сериясида “Севилья”дан мағлубиятга учради ва келаси мавсум Чемпионлар лигасида ўйнаш имкониятини ҳам қўлдан чиқарди.

Мавсум омадсизлари – “Кремонезе” ва “Сампдория” қуйи дивизионга шўнғиши маълум бўлиб улгурган.

А Серияда ечилмаган ягона масала – А Серияни тарк этадиган учинчи номини аниқлаб олиш бўлиб турибди. Ҳозирча, бир хил – 31 тадан очко жамғарган “Специя” ва “Верона” интригани сақлаб қолган холос.

Сўнгги турда ҳар икки жамоа сафарда кучли рақибларга қарши тўп тепади.  Элдор Шомуродов “Специя”да ўтказаётган  вақтинчалик фаолиятини Римда якунлайди. Леонардо Семпиличи шогирдлари охирги учрашувда аламзада “Рома”га қарши ўтказади.

“Верона” барча масалани ҳал қилиб бўлган “Милан” меҳмони бўлади.

А Серия қоидасига кўра, агар “Специя”  ва “Верона” чемпионатни бир хил очко билан якунласа, юқори дивизионда ким қолишини қўшимча ўзаро тўқнашувда аниқлаб олади.

Шу жараёнда ESPN нашри журналистлари А Серияда мавсумнинг энг ёмон ўйинчиларини аниқлаб чиқди ва уларнинг рамзий терма жамоасини тузди.

Рамзий терма жамоа қуйидагича кўриниш олди:

Голкипер: Самир Ханданович (“Интер”).

Ҳимоячилар: Хуан Куадрадо (“Ювентус”), Мараш Кумбула (“Рома”), Милан Шкриньяр (“Интер”), Рикардо Родригес (“Торино”).

Ярим ҳимоячилар:  Поль Погба (“Ювентус”), Леандро Паредес (“Ювентус”), Флорьян Товен (“Удинезе”), Шарль де Кателаре (“Милан”).

Ҳужумчилар: Дивок Ориги (“Милан”), Дуван Сапата (“Аталанта”).

Таъкидлаш жоизки, жорий мавсум Элдор Шомуродов учун ҳам муваффақиятли бўлди, дейиш қийин. Легионеримиз “Рома” таркибидаги жойини йўқотди. Пойтахт “бўрилари” сафида олти марта майдонга тушган ҳамюртимиз қишда ижарага бериб юборилди.

“Специя”да ҳам Элдор бор маҳоратини кўрсата олгани йўқ. Вақт ўтиши билан захирага ўтириб қолди. Шомуродов янги жамоасида 14 та ўйинда қатнашиб, ўз ҳисобига биттадан гол ва ассист расмийлаштирди.