Бугун “Афсунгар”нинг таваллуд куни

Бразилия футболи деганда негадир шу инсон хаёлимга келаверади. Унинг сариқ либосда майдонга чиқиб келиши, тўп билан ҳаракатию, тўпсиз туриши ҳам ўзгача.

Ҳатто соч турмагидан тортиб, эластик ҳаракатлари уни эслашга мажбур қилаверади. Ҳа, у даҳо даражасига кўтарила олган,  футбол сеҳргари. 

Роналду ди Асис Морейра. Уни кўпроқ Роналдиньо ёки Роналдиньо Гаушо сифатида яхши танишади.

У 1980 йилнинг 21 мартида Бразилиянинг Порту-Алегри шаҳрида туғилган.

Мен Роналдиньони таниган ва унинг ўйинларига ошуфта  бўлган кезларимда “афсунгар” Италия гранди “Милан”да ўйнар эди. Мен унинг “Милан”даги ўйинларини мақтасам, дадам аввалги жамоаларидаги фаолиятини гапириб берган эди.

Футболнинг ашаддий мухлиси бўлган дадамдан Рональдино ПСЖ ва “Барселона”даги ўйинлари, майдонда бамисоли рақс тушиши, тўп билан заргарона ҳаракатлари, ажойиб зарбалари ҳақида айтиб берар ва “бундай даҳолар фақат Бразилия диёридан етишиб чиқади”, - дерди.

Менима, бу диёрдан Роналдиньодан кейин унинг даражасидаги футболчи ҳали чиққани йўқ.

Роналдиньодан кейин порлаган на Кака, на Неймар “афсунгарлик” бобида унга яқин ҳам келолмади. Тўғри, Неймарнинг айрим феноменал ҳаракатлари Роналдиньони эслатса-да, томошабинларга суънийдек туюлади.

Рони майдондаги рақсларнинг муаллифи, унинг уун оддий бўлган ҳаракатлар аслида такрорланмас даражада бўлгани учун шундай бўлса керак.

Роналдиньо юқори формада нари борса беш йил ўйнади, лекин мана шу муддат бутун дунё мухлисларининг қалбидан жой олиши учун етарли бўлди.

                                                                                                                                                               Шукурулло Жалолов,

                                                                                                                                                               футбол мухлиси.