Бугун "Машъал" жамоасини Отабек Нарзуллаев бошқаради

Бугун Суперлига 3-тури доирасида "Машъал" - "Қизилқум" беллашуви бўлиб ўтади. Ушбу баҳсда муборакликлар клубини Отабек Нарзуллаев бош мураббий вазифасини бажарувчи сифатида майдонга олиб тушади.

"Игор Суровга тезроқ соғайишини тилаймиз!

“Машъал” жамоамиз бош мураббийи Игор Суров бетоблиги сабабли бугунги учрашувда жамоа ёнида бўла олмайди. Айни вақтда мутахассис соғлигидаги муаммолар туфайли туман шифохонасида даволанмоқда.

Шу сабабли бугунги ўйинда жамоани майдон четидан бошқариш вазифасини мураббийлар штаби аъзоси Отабек Нарзуллаев ўз зиммасига олади.

“Машъал” футбол клуби раҳбарияти, жамоа аъзолари ва мухлислар номидан Игор Суровга тезроқ соғайиб, жамоа сафига қайтишини тилаб қоламиз", - дея ёзди клуб матбуот хизмати.