Бугун Суперлигада 10-тур бошланади. Марказий ўйин қаерда?

Бугун Суперлигада 10-тур бошланади. Кечаги Суперкубокдан сўнг энди барчамизни эътиборимиз яна чемпионат учрашувларига қаратилади. 7 та ўйин 30 май – 2 июнь кунлари давомида бўлиб ўтади. Фурсатдан фойдаланиб, бўлажак жуфтликлар хусусида тўхталамиз.

30 май

19:00. “Динамо” – “Қизилқум”

10-тур Жиззахдаги “Динамо” – “Қизилқум” учрашуви билан бошланади. Кетма-кет 7 та ўйиндан бери фақат дуранг ўйнаб келаётган “Динамо” ва унинг мухлислари энди бундай серияга барҳам бериш учун “Қизилқум”ни мағлуб этишга иштиёқлари баланд. Ҳисобида ҳозирча биргина ғалабаси бўлган самарқандликларнинг ўйини кўпчиликка ёқяпти. Айниқса, “Пахтакор” ва “Насаф”га қарши учрашувларда Абрамов жамоаси ҳаммада илиқ таассурот қолдирди. “Динамо” яна ўша ўйинларини кўрсата олса “Қизилқум”га катта муаммолар туғилади.

19:30. “Навбаҳор” – “Олимпик”

Фаворит сўзсиз “Навбаҳор”. Турнир пешқадамлигини ўз қўлига олган наманганликлар чемпионатда ҳали мағлубият нималигини билмай келишмоқда. Тажрибали жамоа ўзиданда ёшроқ жамоага қарши ўйнайди ва буни кузатиш ҳам ўзига яраша қизиқ. “Олимпик” Кападзе бошчилигида кутилмаган натижалар кўрсатишга қодир. Унутмаслик керакки, у шогирдлари билан Олимпиада йўлланмасини қўлга киритишди. Лекин имкониятлар барибир Бабаян жамоасида кўпроқ.

31 май

19:00. “Сурхон” – “Сўғдиёна”

Яхши афиша. “Сурхон” ва “Сўғдиёна” бир-бирга жуда муносиб рақиблар. Ўйин услублари яқин. Жамоаларнинг стратегияси ҳам ўхшаш. Иқтидорли ёшларга асосий эътибор қаратилган. Очиғи, бу клублар иштирокидаги беллашувни кузатиш ҳар қачонгидан қизиқ туюлса ажаб эмас. Имкониятлар эса шубҳасиз 50х50.

19:30. ОКМК – “Металлург”

Тошкент дербисида бу сафар ОКМК – “Металлург” қарама-қаршилигини кўрамиз. Охирги пайтларда ОКМКнинг ўйинида жонланиш сезиляпти. Тўғри, “Металлург”да ҳам шунақа. Охирги учта турда дуранг қайд этишди. Бироқ ҳозирча чемпионатда бекободликлар ҳисобида умуман ғалаба йўқ ва шунга яраша турнир жадвалида охирги ўринда. Бундай дербиларда ҳамма нарса бўлиши мумкин.

1 июнь

19:30. “Бунёдкор” – “Нефтчи”

Аутсайдерлардан бири бўлиб турган “Бунёдкор”ни яна жиддий имтиҳон кутиб турибди. Ҳимояси энг заифларидан бири бўлиб турган бу жамоа чемпионатда 9 та ўйинда ўз дарвозасидан 19 та тўп ўтказиб юборди. “Нефтчи” эса энг оз – 6 та гол ўтказган. Хуллас, ўзига хос қарама-қаршиликлар мавжуд. Албатта, “Нефтчи” бу баҳсда фаворит. Рости, бугунги “Бунёдкор”да “Нефтчи”ни енгиш учун салоҳият етарлими, деган савол пайдо бўляпти. Ҳаммасини ўйинда кўрамиз.

2 июнь

“Андижон” – “Пахтакор”

Суперкубокда пенальтилар сериясида жуда аламли тарзда мағлуб бўлган “Пахтакор” энди чемпионат доирасида сафарда “Андижон” билан ўйнайди. “Шерлар” Андижонга Суперкубок ғолиби сифатида келишлари ҳам мумкин эди. Аммо пенальтилар сериясидаги тайёр ғалабани қўлдан чиқариб юбордилар. Энди Максим Шацких жамоасини “Бобур арена”да фантастик муҳит оғушида яна бир қийин учрашув кутяпти. Бу жамоаларнинг охирги учта ўйинида “Андижон” 2 ғалаба ва 1 дуранг қайд этганини инобатга олсак, “Бургутлар”нинг “Шерлар”га қарши қандай ўйин кўрсатишни билиб олгани аён бўлмоқда. Бу турнинг марказий учрашуви бўлади.

19:30. “Насаф” – “Локомотив”

Ўзбекистон Суперкубогини яна бир бор қўлга киритган “Насаф” жамоасининг энди ўз майдонидаги ўйини ҳақиқий байрамга айланса ажаб эмас. Кайфияти юқори даражада бўлган Рўзиқул Бердиев шогирдлари “Локомотив”га қарши янада катта иштиёқ билан майдонга тушадилар. Лекин Суперкубокдаги чарчоқлар панд бериб қўймасмикин? Бердиев жамоасини бундай бўлишига йўл қўймаса керак. “Локомотив”ни тайёрлаган мураббий кетди. Жамоа ўйинида ўзгаришлар бўляпти. “Насаф” билан баҳсда уларга оғир бўлади. “Насаф” эса юқори темпдан кейин ўз уйидаги имкониятни қўлдан чиқариб юбормаса керак.