Бугунги футбол юлдузларининг кумирлари борми? Роналду, Месси Холанд ва Мбаппе кимнинг ўйинларидан завқ олган?

Мюнхеннинг «Бавария» жамоаси аъзоси Йозуа Киммих ўзининг идеалидаги футболчи ким эканлигини айтди. Немис футболчиси «Барселона» собиқ сардори Хавининг ўйинларидан завқ олганини яшириб ўтирмади. Ҳар қандай буюк футболчининг ўзи кумири бор эканлиги ҳеч кимга сир эмас. Хўш, улар ким? Бугун шу саволга батафсил жавоб беришга уриниб кўрамиз.

Хави Эрнандес:

“Ёшлигимда мен учун Берн Шустердан кучлироқ футболчи йўқ эди. Футболга илк қадамларимни қўйган пайтимда, унинг ўйинларини томоша қилишни канда қилмас эдим. Ўспирин ёшимда Шустер сингари марказий ярим ҳимояга ўтдим. Мен ҳар бир учрашувда у сингари тезкор паслар ва сўнгги узатмаларни амалга оширишни бошладим. Шу даражага чиқишимда, Берннинг хизматлари улкан.

Лионель Месси:

Албатта, Марадонанинг ўйинларини севиб томоша қилганман. Шунингдек, Пабло Аймарни ҳам алоҳида эътироф этган бўлар эдим. У ўзининг пик формасига чиққан пайтлари тўхтатиб бўлмас кучга айланган эди. Унинг майдондаги ҳаракатларини кўргач, футболчи бўлиш орзуси пайдо бўлган.

Криштиану Роналду:

Мен Руи Кошта, Фигу ва Фернандо Коутонинг ўйинини томоша қилгач, бир кун улар билан майдонда бирга тўп суришни орзу қилганман.

Килиан Мбаппе:

Мен бир нечта футболчининг персонал мухлиси бўлганман. Тан оламан, Зиданни жуда ҳам яхши кўрар эдим. Франциядаги деярли барча болалар Зиданнинг ўйинларини томоша қилиб катта бўлган десам, адашмаган бўламан. Роналду менинг болаликдаги кумирларимдан бири. Тўғриси, у билан майдонда тўқнаш келганимда ўзимни жуда ҳам бахтиёр ҳис этдим.

Жоау Фелиш:

Криштиану нафақат майдонда, балки унинг ташқарисида ҳам барчага ўрнак бўлиши мумкин. Унинг қўлга киритган ютуқлари билан мақтанганини сира кўрмаганман. У доимо ғалабага чанқоқлиги билан ажралиб туради. Криш менинг ва Португалия ёшлар жамоасидаги барчанинг кумири. Португалиядаги барча болалар Роналду эришган ютуқларининг ҳеч бўлмаганда 10/1 қисмига эга чиқиш учун ҳамма нарсага тайёр.

Златан Иброҳимович:

Роналдо чинакам феномен эди. У майдонда истаганича ҳаракат қилар, ҳеч ким уни тўхтатиб қолишга ўзида куч топмаган. Агар у тўп билан жарима майдончасига яқинлашиб келса, демак биз «мўъжиза» кўришимиз аниқ. Роналдо ҳақида ортиқча таъриф беришнинг ҳожати йўқ. Айрим футболчилар футбол ўйнайди. Бошқалари эса, футболга айланиб кетади. Мен учун Роналдо ва футбол бир маънони англатувчи икки хил сўз.Тенгдошларимнинг барчаси сингари мен ҳам унга ўхшашга интилганман. Мен учун Роналдо барча замонлардаги энг кучли футболчи.

Эрлинг Холанд:

Мен ёшликда ўзим учун намуна сифатида қабул қилган бир нечта футболчини айта оламан. Фаолиятим давомида кўплаб супер юлдузларни майдонда кўриш насиб этди, бироқ улар орасида Златан Иброҳимовични алоҳида эътироф этиш лозим. Шу ёшида ҳам Ибра ўз классини намойиш этмоқда. У сингари мен ҳам Скандинавияданман. Шундай экан, унинг футболдаги ворисиман, дейишдан фахрланаман.

Роберт Левандовски:

10-14 ёш пайтларимда «Юве» сардори – Алессандро Дел Пьеронинг мухлиси эдим. Вақт ўтгач, «Арсенал» етакчиси – Тьерри Анрининг фанатига айландим. Тўғриси, у исталган вазиятдан гол киритиши мени ҳайрон қолдирган. Кейин, у сингари гол киритишнинг содда услубларидан фойдаланишни бошладим. Анри гол киритибгина қолмай, жамоавий ўйинда ҳам беназир эди. Қанчалар унга ўхшашга ҳаракат қилмай, барибир майдонда Роберт бўлиб қолавердим. Орадан йиллар ўтгач, у билан учрашдим. Анрига айтган биринчи сўзларим шундоққина ёдимда. Унга : «Сен менинг кумиримсан», дедим. У эса, жилмайди ва мендан футболкамни сўради.

Марк-Андре Тер Штеген

Менинг дарвозабонлар орасидаги кумирим сўзсиз, Оливер Кан! У «Бавария» жамоаси тарихидаги энг кучли дарвозабон. Унинг сайёрамиздаги энг кучли дарвозабон эканлигини борасидаги баландпарвоз сўзларни сизга айтмоқчи эмасман. У майдонда рақибни қўрқитар, жамоа учун жон куйдирар ва энг муҳим паллада жамоаси жонига оро кирар эди. У мен учун барча замонларнинг энг кучли кипери бўлиб қолади.

Неймар:

Робиньо болаликдаги кумирим сифатида тарихда қолади. Мен болалик чоғимдаёқ унинг ҳаракатларини такрорлашга уринар эдим. Тан олиш лозим, ҳар жабҳада Робиньога ўхшашни истаганман.

Марко Асенсио:

Болаликда хонамга Зиданнинг суратлари туширилган баннерларни ёпиштириб қўйишни хуш кўрар эдим. Айнан шу суратга тикилар эканман, футболчи бўлишга қарор қилганман. Зидан майдонда интеллигент бўлибгина қолмай, керакли паллада «жанг» қилишга қодир чинакам универсал эди. Тўғриси, у сингари футболчини бошқа ҳеч қачон учратмадим.

Месут Ўзил:

Зидан ҳар доим мен учун футбол тарихидаги энг кучли футболчи бўлиб қолади. Болалик пайтимда унинг номи туширилган футболкада кўчамизда тўп тепар эдим. Тўғриси, ҳозир ҳам YouTube орқали унинг ҳаракатлари акс этган видеороликларни томоша қиламан.

У билан илк бор учрашганимизда, ҳаяжондан терлаб кетган эдим. У эса, жуда самимий тарзда мени кутиб олди. 15 дақиқалик суҳбатдан сўнг, мендан бахтли одам йўқ эди. Унинг ўйин услуби доимо мени ўзига мафтун этган. Зидан ҳеч қачон шошилмас, майдонда доимо ҳамма нарсани кўриб туришга ўрганган. Энг муҳими, у тўпни ҳеч қачон ўзида кўп ушлаб қолмас эди. Унга ўхшаган футболчини ҳали дунё кўрмаган.

Зайниддин Зидан:

Мени Франческолининг техникаси ҳайратда қолдирди. Мен Энзонинг ўйинларини кўргач, у сингари тўпни олиб қўйиш имконсиз футболчига айланишга қарор қилдим. Ҳар қандай кумирнинг қайсидир одати футболчиларда кузатилади. Мен Энсо сингари дриблинг ишлатишни соатлаб машқ қилар эдим. У яшил майдонда чинакам рассом эди.

Луис Суарес:

Болалик пайтимда барча уругвайликлар сингари Энсо Франческолига тақлид қилганман. Каттароқ бўлгач, Габриел Батистутага ўхшашни орзу қилишни бошладим. Унга ўхшаш учун 9 рақамни танлаганман. Ўзим тўп сурган деярли барча клубларда 9 рақамда тўп сурганман. Мен кўплаб суперюлдузлар билан тўқнаш келдим, бир жамоада тўп сурдим, аммо ўз фикримда қоламан. Менинг кумирим – Батистута!

Серхио Агуэро:

Жанубий Америкада Европалик футболчиларнинг ўйинларини кузатиб борадиган болалар жуда кам. Мен уларнинг бири эдим. Эсимни таниганимдан бери, Майкл Оуэннинг мухлисиман. Бу ҳақида ўз фаолиятимни қамраб олган китобимда ҳам маълум қилганман. У мен сингари паст бўйли бўлишига қарамай, ҳужумда тўхтатиб бўлмас кучга айланар эди. Унга тақлид қилганим учун ҳам доимо 10-рақамда тўп суришга уриндим. Ҳозир ҳам 10-рақам менга Оуэннинг ўйинларини эслатади.

Муҳаммад Салоҳ:

Футболчилик фаолиятимни бошлашдан аввал, Зидан, Тотти ва Роналдодан кучлироғи йўқ деб ўйлар эдим. Кейин улғайдим, кўплаб супер футболчилар билан танишдим. Шунга қарамай, мен учун ўша учлик кумирларим бўлиб қолаверади. Уларнинг майдонда тўп билан муносабатда бўлиши чинакам санъат асарига айланиб кетар, бундан кўз узиб бўлмас эди. Уларда ўзига хос ўйин услуби мавжуд бўлиб, бир-бирини такрорламас эди. Роналдо туғма тўпурар, Зидан сеҳргар, Тотти фантастик техника эгаси!

Антуан Гризманн:

Мен Бекхэмни ўз кумирим, деб бемалол айта оламан. Айнан шу сабабли доимо енги узун футболкада тўп сурдим. 7-рақамни ҳам айнан Бексга бўлган ҳурматим сабабли танлаганман.