Coca-Cola Суперлиганинг 21-туридаги охирги учрашувда “Бухоро” – “Сўғдиёна” жамоалари ўзаро беллашадилар. Маълумки, бухороликлар ўз уй ўйинларини Муборакдаги стадионда ўтказиб келмоқдалар.

Шуни айтиш керакки, ушбу жамоаларнинг ўзаро тўқнашувлари 50-юбилей ўйинга айланади. Бунгача бўлиб ўтган 49 учрашувда устунлик мезбонлар тарафида. Боиси, уларнинг ҳисобида 23 та ғалаба бор. Биринчи даврада Жиззахдаги баҳсда майдон эгалари 3:1 ҳисобида зафар қучганди. Ушбу ғалабани қўшиб ҳисоблаганда, “Сўғдиёна”нинг “Бухоро” устидан эришган муваффақиятлари 19 тага етди. 7 та учрашув дуранг билан тугаган. Тўплар нисбати 66-64 “Бухоро” фойдасига.

Қизиғи, “Сўғдиёна” “Бухоро” майдонида охирги марта қачон ғалаба қозонганини биласизми? Бунга ҳам 12 йил бўлди. 2008 йилнинг 13 сентябрь куни жиззахликлар сафарда 2:3 ҳисобида ғалаба қозонишган. Шундан бери, улар “Бухоро” мезбонлигидаги учрашувларда уч очкони қўлга кирита олишмаяпти.

Бундан ташқари, бухороликлар сўнгги бор ушбу рақибини 2018 йилги мавсумда мағлуб этишган. Ўшанда ўз майдонида 3:0 ҳисобида “Сўғдиёна”ни таслим қилишганди. Охирги бешта учрашувнинг учтасида жиззахликларнинг қўли баланд келган. “Бухоро” эса биттадан дуранг ва ғалабага эришган. Лекин 50-юбилей баҳсда Жамшид Саидов бошчилигидаги мезбонларга ғалаба сув ва ҳаводек муҳим. Чунки улар турнир жадвалида 11 очко билан сўнгги поғонада боришяпти. Суперлигада қолиш учун эса бухороликларни фақат ғалаба қониқтиради.

Матнда хатолик топсангиз, ўша хатони белгилаб, бизга жўнатинг (Ctrl + Enter)