3 декабрь куни чемпионат поёнига етади. “Пахтакор”, “Насаф” ва АГМК кучли учликдан жой олганлигини энди ҳамма билади. Лекин Суперлигани қайси жамоа тарк этиши ҳали ҳам номаълум бўлиб турибди. Балки кўпчиликнинг айнан сўнгги турда лигани қайси клуб тарк этиши қизиқтираётган бўлиши ҳам мумкин.

Ҳозирча бу борада учта даъвогар бор ва булар анчадан бери Суперлигада жон сақлаб қолиш учун курашиб келмоқда. “Бухоро”да 14, “Андижон”да 16 ва “Сурхон”да 17 очко бор. Қизиқ томони шундаки, бухороликлар ўтган йили ҳам лигада қолиш учун охиригача курашганди ва сўнгги турда ўз уйида АГМКни 2:1 ҳисобида мағлуб этиш орқали Суперлигада жон сақлаб қолган ва унинг ўрнига “Динамо” про-лигага равона бўлган. Агар “Бухоро” – АГМК ўйини ёдингизда бўлса, мезбонлар охирги дақиқаларда пенальтидан киритилган гол эвазига ўта қимматли ғалабани қўлга киритганди. Қизиқ жиҳати, ўша беллашувни яқинда ҳакамликдан четлатилган Жасур Мухторов бошқарган.

агмк бухоро3_1

“Бухоро” ўтган йилги хатолардан тўғри хулоса чиқармагани бу йил яна бир бор ўз исботини топди. Чунки клуб ҳамон аутсайдер мақомида ва лигада қолиш учун курашиш билан овора бўлиб юрибди. Клубда мураббийлар ва раҳбарият ўзгаргани билан натижа салбийлигича қолиб кетяпти. Турнир жадвали эса ҳаммасини айтиб турибди. Тақдир ҳазилини қарангки, “Бухоро” бу йил ҳам охирги ўйинини АГМК жамоасига қарши ўтказади. Фақат бу сафарги ўйин Бухорода эмас, Олмалиқда ўтади. Лекин сценарий ўша-ўша, ғалаба доимгидек “Бухоро”га сув ва ҳаводек зарур. АГМК эса учинчи ўринни эгаллаб бўлди, бу ўйин Миржалол Қосимов жамоаси учун аслида расмиятлик учун холос. Аммо улар ўтган йилги аламли мағлубиятни унутмаган бўлсалар ажаб эмас. Таркиб, маҳорат ва савия жиҳатидан шубҳасиз АГМК кучли. Қизиқ, “Бухоро” ўтган йилги сценарийни такрорлаш учун қандай чора топади?

Ёдингизда бўлса, жамоаларнинг биринчи даврадаги беллашуви жуда қизиқарли тарзда кечиб, унда 2:2 ҳисоби кузатилганди. Ўша ўйин ҳам турли мунозараларга сабаб бўлганлиги ҳамон ёдимизда. Биринчи давранинг охирги ўйини эди ва АГМК ҳали ҳеч кимга ютқазмаганди. Аммо ўша баҳсда улар ғалабага тенг дурангни қайд этганди. Бош ҳакам Вадим Агишев учрашувга тўрт дақиқа қўшиб берган ва якунда АГМК футболчиси 90+6-дақиқада гол ургани боис ҳакамга нисбатан турли эътирозлар ҳам янграганди.

агмк бухоро2

Афтидан, бу жамоалар ўртасидаги саргузаштларга бой ўйин яна давом этади, шекилли. Бизга маълум бўлишича, “Бухоро” жамоаси АГМК устидан ғалаба қозониш учун тиш-тирноғи билан курашишга тайёргарлик кўряпти. Клубда тажриба камлиги кўриниб турибди, балки кучли иштиёқ эвазига нимадир қила олишлари мумкин. Бироқ ҳаммаси барибир АГМКга боғлиқ. Чунки жамоа аъзолари охирги беллашувга ҳам олдингилари каби жиддий муносабатда бўлиб, ўз ўйинларини кўрсатадиган бўлса, унда “Бухоро” рақиб олдида ип эшолмаслиги турган гап. Мабодо, Қосимов жамоаси охирги ўйинга жиддий қарамаса, унда “Бухоро” бундан фойдаланиб қолиши мумкин. Ҳозирча булар ўйиндан олдинги турли фаразлар холос. Ҳаммаси майдондаги курашга боғлиқ. Яна бир гап: “Бухоро”нинг асосий рақобатчиси “Андижон”нинг ҳам ўйинини назардан четда қолдирмаса керак. Боиси, водий жамоаси охирги турни чемпион – “Пахтакор”га қарши ўтказади. Кўпчилик эса Шота Арвеладзени “Андижон”га қарши иккинчи таркибидан фойдаланишини тахмин қилмоқда. Агар шундай бўлган тақдирда ҳам чемпионнинг савияси ва ўйини барибир андижонликларникидан кучли. Кўриб турибсизки, “Бухоро” ва “Андижон”нинг охирги рақиблари амалдаги совриндорлар. Бу эса уларнинг имкониятини пасайтириш табиий. Агар иккала клуб турнир жадвалида ўз ҳолича қоладиган бўлса, “Бухоро” Суперлигани тарк этиши муқаррар бўлади. Лекин жондан чиқмаган умид деган гап бор, “Бухоро” тақдир туҳфа этганидек яна АГМКни мағлуб этишга мажбур. Кўрамиз, Қосимов ва унинг жамоасининг реакцияси қандай бўларкин?!

 

Матнда хатолик топсангиз, ўша хатони белгилаб, бизга жўнатинг (Ctrl + Enter)