“Buxoro” TsSKAga o‘yinchi jo‘natdi

“Buxoro” jamoasi asli Moskvaning TsSKA klubiga tegishli bo‘lgan eronlik chap qanot himoyachisi Amir Husayn Reyvandini “armiyachilar” safiga qaytarib yubordi.

O‘tgan mavsumda O‘zbekiston chempionati Pro-ligasida ishtirok etgan buxoroliklar Amir Reyvandini 2024 yilning iyulida ijaraga olgan edi.

20 yoshli futbolchi Pro-Ligada 9 ta uchrashuvda ishtirok etdi va ma’lum ma’noda o‘yin tajribasiga ega bo‘lib, mahoratini oshirdi. Biroq eronlik legioner “Buxoro”da samarali harakatlarni amalga oshira olgani yo‘q.

Reyvandi Eronning “KIA” klubi tarbiyalanuvchisi hisoblanadi. TsSKA uni 2024 yilning fevralida ijarga olgan va bir necha oy sinaganidan keyin 100 ming evro evaziga transfer qilgan edi.

Transfermarkt portali ekspertlari “Buxoro” safidagi o‘yinlaridan keyin iste’dodli futbolchining transfer summasini 150 million evrogacha ko‘tardi.

Ayni paytda TsSKA klubi qishki ta’tilga chiqqan. Jamoa dam olishdan qaytganidan keyin klub rahbariyati Amir Husayn Reyvandining  kelajagiga oydinlik kiritadi.