Чарльз Оливейранинг кейинги рақиби Пэдди Пимблеттми?

UFC собиқ чемпиони Чарльз Оливейра навбатдаги рақиби сифатида британиялик Пэдди Пимблетт тилга олинаётгани ҳақидаги хабарларни рад этди.

"Пэддига ҳурматим баланд, лекин мен орқага эмас, олдинга қарайман. Мақсадим — камар. Ҳозир бутун диққат-эътиборим шунда. Ўйлайманки, кейинги жангда чемпионлик камари учун айнан мен жанг қиламан. Жастин Гэтжи келаси йил октагонга чиқишини айтди. Мен шошилмаяпман ва кута оламан. Менга фақат битта қўнғироқ кифоя", — дея таъкидлади бразилиялик "Olhar da Luta" нашрига берган интервьюсида.

Маълумот учун, икки ҳафта аввал Чарльз Оливейра  "UFC 334" турнирида Диего Лопесга қарши жанг қилиши ҳақида ҳам хабарлар тарқалганди. Бироқ ҳозирча промоушен буни расман эълон қилмади.