“Челси”, қимматбаҳо юлдузларинг қани?

“Астон Вилла” ва Англия терма жамоасининг собиқ футболчиси Гэбриэл Агбонлахор “Челси”нинг трансфер сиёсатини кескин танқид қилди. 

- “Челси” катта суммага олган айрим ўйинчиларнинг аҳволига бир қаранг, улар умуман ўйнаётгани йўқ.  “Брайтон”га қарши учрашувда Нету рақиб футболчисини тўхтатишга ҳаракат ҳам қилгани йўқ. Ваҳоланки, уни жуда катта пул олишган эди. 
Мадуэке бир ҳафта зўр ўйнаса, кейингисида қўлидан ҳеч нарса келмайдиган ўйинчига айланади. Фернандесга ярим ҳимояда “нон” йўқ. Унга етакчилик қобилияти ва сифатлари етишмаяпти. 
“Челси” фойдасиз ўйинчиларга қанча пулни увол қилганини тасаввур қилишнинг ўзи даҳшат.
Бадьяшиль 42 миллион евро туради, уни ўйинини кўрганимиз йўқ. Мудрикнинг трансфери шунчаки фожеа. Энцо, Нету ва Нкунку ҳам қимматбаҳо ўйинчилар. 
“Аристократлар” Феликс учун 54 миллион евро харажат қилиб, уни ижарага бериб юборди. Булар қанча маблағни бекорга сарфлаганига эътибор беринг, - деди Гэбриэл Агбонлахор. 

Дарҳақиқат, “Челси” мутасаддилари кейинги йилларда жуда кўп трансферларни амалга ошираётган ва мураббийларни кетма-кет алмаштираётганига қарамай, жамоа ўйинида сезиларли ижобий ўзгариш бўлмаяпти.