“Челси” 150 миллион еврога суперҳужумчи олади

Сўнгги йилларда “Челси” трансферларга улкан маблағ сарфлади. Лондонликлар бу трансфер сиёсатини давом эттириш ниятида.

Fichajes портали маълумотларига кўра, “аристократлар” ҳужум чизиғини кучайтириш учун “Атлетико” форварди Хулиан Альваресни трансфер қилмоқчи.

Бунинг учун лондонликлар 150 миллион евро таклиф қилишга тайёргарлик кўрмоқда.

Бундан ташқари, Альваресни “Челси”га ўтишига кўндириш учун унинг Аргентина терма жамоаси ярим ҳимоячиси Энцо Фернандес ёрдам бериши кутиляпти.

Агар “Челси” Альваресни 150 миллион еврога сотиб олса, бу клуб тарихидаги энг қиммат трансферга айланади. Ҳозирча клуб рекорди — Энцо Фернандеснинг 121 миллион евролик трансфери ҳисобланади.

25 ёшли Хулиан Альварес Англия Премьер-лигасига бегона эмас. Аргентиналик тўпурар илгари “Манчестер Сити”да ўйнаган ва Эрлинг Холанд соясида қолиб кетганидан кейин “Атлетико”га ўтиб кетган эди.