“Челси” Каримни беш клуб билан талашяпти

Карим Кулибали Бундеслигада атиги 22 та ўйин ўтказган бўлса-да, аллақачон Европанинг қатор топ-клублари эътиборини тортган.

Журналист Флориан Плеттенбергнинг айтишича, “Челси” раҳбарияти “Вердер” ва Германия ёшлар терма жамоаси марказий ҳимоячиси – 18 ёшли Карим Кулибалини трансфер қилиш учун курашга қўшилган.

Ҳимоячи учун курашда лондонликларга  “Пари Сен-Жермен”, “Наполи”, “Реал Мадрид”, “Ньюкасл” ва “Манчестер Юнайтед” каби қудратли клублар рақобатчи ҳисобланади.

Сўнгги хабарларга кўра, “Вердер” футболчини сотишга тайёр, айниқса жамоа мавсум якунида Бундеслигадаги жойини ушлаб қола олмаса, трансфер эҳтимоли ошади.

Шу билан бирга, немис клуби ушбу трансфердан яхши даромад олишни истамоқда.

Германия манбаларига кўра, Карим Кулибали учун “Вердер” мутасаддилари клуб тарихидаги рекорд сумма — 40-50 миллион евро талаб қилади.

“Челси” Кулибалини катта салоҳиятга эга яна бир юқори даражали иқтидор, деб ҳисобламоқда. Бу ҳақиқатдан ҳам шундайми — вақт кўрсатади.

Карим Кулибали “Гамбург” академиясидан етишиб чиққан ва 2025 йилнинг  июль ойида “Вердер” билан шартнома имзолаган. У ўша йилнинг август ойида Бундеслигада дебют қилган ва ҳозирга қадар Германия чемпионатида 22 та ўйин ўтказган.

Марказий ҳимоячи юқори даражада катта тажрибага эга эмас ва фақат Германия ёшлар терма жамоасида (U-17, U-18, U-19 ва U-21) бир нечта ўйин ўтказган.