“Челси” кутган мураббий Лондонга етиб келди

Ҳозирга қадар Франция чемпионатида “Страсбург” жамоасини бошқариб келган Лиам Розеньор яқин вақт ичида “Челси” бош мураббийи этиб тайинланади.

Англиялик мутахассис аллақачон Лондонга етиб келган ва клуб раҳбарияти билан музокараларнинг якуний босқичида турибди.

Инсайдер Фабрицио Романонинг маълум қилишича, Розеньор яқин 24 соат ичида “аристократлар” раҳбарияти билан якуний учрашувни ўтказади. Шундан сўнг унинг бош мураббийликка тайинланиши ҳафтанинг охирига қадар расман эълон қилиниши мумкин.

Франция клубида эса 41 ёшли мураббийга ўринбосар қидириш ишлари аллақачон бошлаб юборилган.

Эслатиб ўтамиз, 1 январь куни “Челси” бош мураббий Энцо Мареска билан хайрлашган эди. Усиз ўтказилган биринчи ўйинда лондонликлар «Манчестер Сити» билан дуранг ўйнади (1:1).