"Челси" "Ливерпуль" дарвозабонини қўлга киритмоқчи

Лондондаги "Челси" клуби "Ливерпуль" дарвозабони Каомхин Келлехерни ўз сафига қўшиб олишни режалаштирмоқда.

Ирландиялик посбон аллақачон Алиссоннинг дублёри ролига кўникишга мажбур бўлган, янги мавсумдан эса унинг жамоада учинчи дарвозабон бўлиб қолиш эҳтимоли бор. Бунга сабаб – "қизиллар" сафига Георгий Мамардашвилининг қўшилиши.

"Football Insider" нашрининг хабарига кўра, "Челси" Келлехер учун 40 миллион фунт стерлинг (тахминан 48 миллион евро) таклиф қилишга тайёр. "Transfermarkt" портали 26 ёшли дарвозабоннинг трансфер нархини 22 миллион евро атрофида баҳоламоқда.

Жорий мавсумда Каомхин Келлехер "Ливерпуль" сафида 18 та ўйинда майдонга тушиб, 17 та гол ўтказиб юборган.