"Chelsi" va "Manchester Yunayted" A Seriya yulduzi uchun kurashadi

"Bolonya" qanot hujumchisi Jonatan Rou faoliyatini Angliya Premier-ligasida davom ettirishi mumkin. Bu haqida "Gazzetta dello Sport" nashri xabar berdi.

Manbaga ko‘ra, 22 yoshli futbolchi bilan shartnoma imzolashga "Chelsi" va "Manchester Yunayted" qiziqish bildirmoqda. Klub vakillari o‘yinchining Italiya chempionatidagi o‘yinni kuzatib bormoqda. Rouning "Bolonya" bilan shartnomasi 2029 yil o‘rtalariga qadar amal qiladi.

Ma’lumot uchun, vingerning bozor qiymati 20 million yevroga baholanmoqda. Joriy mavsumda Rou 39 ta o‘yinda maydonga tushib, yettita gol urdi va to‘rtta golli uzatmani amalga oshirdi.