Чирчиқда Ўзбек жанг санъати бўйича беллашувлар ўтказилди

Жорий йилнинг 18-21 ноябрь кунлари Чирчиқ шаҳридаги Ўзбекистон давлат жисмоний тарбия ва спорт университети манежида миллий спорт туримиз бўлган Ўзбек жанг санаъти бўйича ёшлар, ўсмирлар ва катталар ўртасида Ўзбекистон кубоги беллашувлари бўлиб ўтди. 

Юқори савияда ўтказилган мазкур мамлакат кубоги баҳсларида Қорақалпоғистон Республикаси, Тошкент шаҳри ҳамда барча вилоятлардан 800 нафарга яқин спортчилар Ўзбек жанг санаътининг "Мерган чавандоз", "Мерган спортчи"," Темурийлар беллашуви" йўналишлари бўйича ғолиблик учун куч синашишди. Муросасиз ва шиддатли тарзда ўтган беллашувларнинг якуний натижаларига кўра умумжамоа ҳисобида фахрли биринчи ўринни Тошкент вилояти жамоаси қўлга киритган бўлса, иккинчи ўринни Сирдарё вилояти жамоаси эгаллади.Учинчи ўрин Тошкент шаҳри ва Жиззах вилояти спортчиларига насиб этди.

Барча вазн тоифаларида ғолиблик шоҳсупасига кўтарилган атлетлар медаль ва диплом билан тақдирланишди. Шунингдек мусобақа доирасида Латвия давлатида ҳам миллий спорт туримиз Ўзбек жанг санаътини кенг ривожлантириш мақсадида мазкур спорт тури бўйича федерация ташкил этилгани ва ушбу федерацияга латвиялик Андрес Дреманис раис этиб тайинлангни муносабати билан унга Ўзбек жанг санаъти федерацияси раиси Пўлат Ўсмонов томонидан гувоҳнама ва ташаккурнома  тантанали тарзда топширилди. 

Илҳом РАҲМОНОВ тайёрлади