Далтоник ҳакам, қуруқликдаги денгизчи ва оёғи узун бўлиб кетган йигит. Суперлига иккинчи турида кимлар “қовун туширди”?

Норбой Муаллим Суперлигада қовун туширганларни "пушка"га олишда давом этади. Хўш, бу сафар кимлар бизнинг нишонимизда? Бу сафарги "ТОП-5" аввалгисидан анча воқеаларга бой ўтди!

Мартин Боаке – қуруқликдаги денгизчи

2-турни якунлаб берган баҳс томошабоплик борасида унча-мунча триллерга “дам” берадиган даражада ўтди. Иккита кичик камбэк, якунда ҳал қилинган гол. Аввалига инобатга олинмаган, сўнг VAR ҳисоблаган гол. Шунчаки даҳшатли сценарий остида кечган ўйинда ОКМКга бир йигит бироз панд бериб қўйди. У ҳам бўлса, Мартин Боаке! Қандай қилиб? Унинг нима айби бор? Италиялик форвард жамоа биринчи бўлимни жуда суст ўтказишига асосий сабабчи. Миржалол Қосимов рақиб чуқур ҳимояланаётгани боис марказ орқали ёриб киришга уринди. Шу сабаб биринчи бўлим давомида Мартин Боаке ва Рубен Санчеслар ўзига ҳос ҳужум ва марказ ўртасидаги кўприк вазифасини бажариб бериши кутилган эди. Билмадим, Боаке ўша куни уйидаги дазмолни ўчирмай чиққан чоғи, бирорта эпизодда жамоаси учун тўпни сақлаб қолишни уддалай олгани йўқ. Прессингда ҳам фаол бўлмади. Содда қилиб айтганда, Мартин майдонда ўзини ярим профессионал футболчилардек тутди. Кийиниш хонасида Миржалол Қосимовни яхшигина “дуо”сини олган чоғи, 46-дақиқадан бошлаб ўрнини Сиявуш Ҳақназари эгаллади. Тўғри, “Бунёдкор” билан баҳсда уни мағлубиятга сабабчи қилиб кўрсатмоқчи эмасман, бироқ 2-турдаги футболчиларнинг бўйидан баланд сакрагани фонида Мартин жамоасини бироз уялтириб қўйгани ҳақиқат.

Черан – нишонга теккизмаган снайпер

Сўнгги йилларда "Пахтакор"нинг "козер қартаси"га айланиб қолган серб бу рўйхатда пайдо бўлишини ҳеч ким тахмин қилмагани аниқ. "Нефтчи"га қарши ўйинда "Пахтакор" тактик ва стратегик томондан ўйинни бой берди. Левченко Максим Шацкиҳдан доим бир қадам олдинда бўлди. Айнан шу устунликни "шерлар" ижрочилар даражаси эвазига йўққа чиқариши, вазиятни ўнглаши лозим эди. Айнан Драган катта саҳнага чиқиши тахмин қилинган ўйинда болқонлик футболчи фаолиятидаги энг катта "фэйл"лардан бирини амалга оширди. У 3-4 метрдан деярли бўш қолган дарвозага аниқ зарба йўллай олмади.

Ўша пайтда ҳисоб 1:0 бўлиб тургани боис бу гол нафақат таблодаги ҳисобга, балки майдондаги футболчиларнинг руҳий холатига ҳам таъсир қилиши, якунда омадсиз ўйинни 3 очкога айлантириши ҳеч гап эмас эди. Жамоа сардори ва бир неча йиллик етакчиси матчдаги энг муҳим эпизодни ўз фойдасига ҳал эта олгани йўқ. Буёғига "Нефтчи" тишлаган жойини узиб олди. Аслида, биргина вазият учун Норбой Муаллим ҳаммани "ТОП-5"ликка таклиф этавермайди. Фарғонадаги баҳсда "йўлбарслар" 3 марказий ҳимоячи билан ҳаракат қилди. Черанга қийин бўлгани рост, аммо ташқаридан қараганда у тақдирга тан бергандек кўринди. На прессингда, на ортга қайтиб вазият яратишда ва на кескин узатмаларда ундан фаоллик кўрганимиз йўқ. "Пахтакор"нинг Суперлига тарихидаги энг омадсиз стартини 50 фоизини бемалол Драган акани бўйнига юклаворсак, бўлади. Ахир бизда омадсизлик учун айбдор излаш доим трендда бўлган!

Жасур Жалолиддинов – оёғи узун йигит

Бу йигитча Ўзбекистонда керагидан ортиқ қолиб кетгани рост. РПЛ ва ҚПЛларни кўриб келгач анча дадиллашган йигит, Осиё кубогидаги фурордан кейин ҳеч ҳам Суперлигада ўйнагиси келмай қолди, чоғи. Қисман уни тушуниш мумкин. Жасур таниқли "Тhe Guardian" нашри томонидан сайёрамизнинг энг кучлилари қаторида эътироф этилган вундеркинд эди. Афсуски, йиллар ўтмоқда. Футбол ривожланяпти, аммо Жалолиддинов ҳали-ҳамон келажаги порлоқ ёш футболчи мақомида юрибди.Бу мавсумда "Олимпик" чап ёни билан уйғонгандек. Йигитлар акаларини хафа қилмаслик учун эмас, чемпион бўлиш учун "жанг" қилишни бошлаб юборган. Биласиз, амбициялар катталашса, ҳарорат кўтарилади, темп ошади. Кападзе биринчи ўйинда айнан шу мақсадда шогирдлари билан Суперлига стартини ўтказди. "Пахтакор" доғда қолдирилди. Иккинчи ўйинда ҳам барчаси режа асосида бораётган эди. Тезкор гол, майдонда доминантлик, руҳий устунлик ва бошқа омиллар. Кейин нима бўлди? Топдингиз, эркатой Жалолиддинов йўқ жойда қизил олиб, шерикларига панд берди.

Деярли тугаб бўлган эпизодда Ҳислат Халиловнинг оёғига тепишни нима кераги бор эди? Хўп, бу қизилга тортиши ёки тортмаслиги бошқа масала. Айнан шу эпизодда ўз эгосини енгиб, бошқа йигитларни меҳнатини ҳурмат қилиш керакмасмиди? Билмадим, Жасур енгилгина тепиб, ҳуморидан чиқишни афзал кўрди. Баҳс якунланганидан сўнг Тимур Кападзе Жасур сабабли жамоа 3 очкодан айрилганини алам билан сўзлади. Ҳозирча Жасурнинг Суперлигадаги статистикаси 2 ўйин, 0 гол, 0 ассист ва -2 очко.

Аскер Нажафалиев – Шошқалоқ 

"Навбаҳор" ва "Металлург" баҳсида ишлаган ҳакам Аскер Нажафалиев иккинчи поғонадан жой олди. Тўғри, рефери бир қарашда ўйинни ёмон бошқаргани йўқ, аммо баҳс якунланганидан кейин кўплаб факторлар юзага чиқиб келди. Иброҳим Ибрагимовга кўрсатилган қизил, эрта чалинган ҳуштак (натижада, "Металлург"нинг голи инобатга олинмади) ва бошқа кичик деталлар сабабли Аскер бу рўйхатдан ўрин эгаллади. Аслида, ҳакамларни ҳар турда ёдга олишни биз истамаймиз. Сабаби, футболдаги бу омил юзага чиқиши бошқа энг муҳим нарсаларни беркитиб кетади. Шунга қарамай, ҳакамларимиз бу йил ҳам трендда бўлмоқчи, чоғи. Ҳар ҳолда, ҳаракатни анча эрта бошлаб юборишган.

Ҳа, айтганча, Аскер инобатга олинмаган гол учун "Металлург" устозидан ўйиндан сўнг узр сўраб қўйишга ҳам улгурган. Яшавор, азамат!

Раҳимбек Каримов - далтониклик юқумли эмасми? 

Нега Раҳимбек Аскердан юқорироқ ўринни эгаллади? Гап шундаки, Каримов ўзи бошқарган ўйинда истамаган ҳолда (шундай деб умид қиламиз) баҳс натижасига таъсир кўрсатиб қўйди. Намангандаги ўйинда "Навбаҳор" барибир рақибдан кучлироқ эканлиги кўриниб турган эди, аммо "Сурхон" - "Андижон" ўйини тенг курашлар остида ўтаётган эди.

Ҳа айтганча, у бошқарган баҳсда хатонинг катта қисмини VARдаги акахонлар (Азиз Асимов, Алишер Усмонов) бўйнига олиши мумкин. Офсайдни аниқлаштирувчи чизиқ айнан улар томонидан нотўғри чизилгани кейинроқ маълум бўлди. VARдагилар рангни ажрата олмай қолгани боис бир киши кам бўла туриб ҳисобни очган жамоа яхшигина руҳий ва стратегик зарба еди. Суперлига бошланганига энди икки тур бўлишига қарамай, ҳакамлар рейтингда биринчи ўрин учун курашни бошлаб юборишди. Почин бор!

Норбой Муаллим