Даврон Файзиев: "Ҳакам ҳақида эътироз билдириб, 3 та ўйинга дисквалификация бўлдим, яна мендан ҳакам тўғрисида сўраяпсиз"

Про лигадаги кураш борган сари қизғин тус олаётганини кўриб тургандирсиз. У ерда ҳар бир жамоа жиддий курашга киришиб кетди.

Суперлигадан про лигага қайтган “Қўқон-1912”га ҳам осон бўлмаяпти. Улар ҳозиргача 4 та ўйин ўтказишди. Шуларнинг 2 тасида ғалаба ва 2 тасида дуранг ўйнашди.

Сўнгги турда қўқонликлар про лига дебютанти “Навбаҳор-фарм”ни қабул қилди. Кўпчилик мезбонларни осон ютади, деб ўйлашганди. Аммо сал қолса ютқазиб қўйиши мумкин эди.

“Қўқон-1912” 0:2 ҳисобидаги натижани бир амаллаб 2:2 га айлантириб, аранг мағлубиятдан қутулиб қолди. Ушбу беллашувдан кейин “Қўқон-1912” бош мураббийи Даврон Файзиев қуйидагиларни айтди:

- Биринчи бўлим “Навбаҳор-фарм” жамоаси устунлигида ўтди, - дея гап бошлади, Даврон Орипович. - Рақиб бизни хато қилишга мажбур қилди. Балки ўйлаган тактикалари тўғридир, буни тан олиш керак. Чунки меҳмонда бу жамоа яхши ўйин кўрсатаётганди. “Динамо”га қарши ўйинини кўриб чиққанимизда бу жамоа 3:0 ҳисобида мағлубиятга учраган жамоа эмаслигига амин бўлгандик. Бизнинг қўпол хатоларимиз мағлубиятга олиб келиши ҳеч гап эмасди. Биринчи бўлимдан кейин ўзгаришларни амалга ошириб, вазиятни ўнглай олдик. Жамоамга раҳмат айтаман. Ҳар доим айтиб чарчамасам керак, яъни, рақибни менсимаслик ёки рақибга ҳурматсизлик қилиш катта хато эканлиги ва бу нима билан тугашини йигитлар ҳали ҳам тушуниб етишмаганга ўхшаяпти. Шу пайтгача футболчимларимга танқид остида фикр билдирмагандим. Лекин бугун шунга мажбур бўляпман. Ўз олдига юқори вазифани қўйган жамоа учун бу дуранг мағлубиятга тенг ҳисобланади.

- Ҳар бир позицияга биттадан тажрибали футболчи етишмаётгандек туюляпти. Бунга нима дейсиз?

- Балки тўғри айтаётгандирсиз. Саволингиз тўғри бўлиши мумкин. Футболда турган ўйинчи эмас, югурган жамоа ютади. Жамоамизнинг биринчи бўлимда кўрсатган ўйинидан ўзим ҳам қониққаним йўқ. Бу нима билан боғлиқлигини кўриб чиқамиз ва таҳлил қиламиз. Олдинги учрашувларда ҳисобда олдинда бориб туриб, иккинчи бўлимда ёмон ўйин кўрсатгандик. Бу сафар биринчи бўлимда ёмон, иккинчи бўлимда яхшироқ ҳаракат қилдик. Футболда майда деталларгача ўрганиб чиқиш керак. Сиз айтган нарсани ҳозир имкони йўқ, фақат биринчи даврадан кейин бўлиши мумкин.

- Учрашувдаги ҳакамларнинг савияси ҳақида нима дея оласиз?

- Ҳакамлар тўғрисида гапириш менга эмас. Бир нима дея олмайман. Уларни текширадиган ўзларини назоратчилари бор. Ҳакам ҳақида эътироз билдириб, учта ўйинга дисквалификация бўлиб жарима тўладим. Яна мендан ҳакамлар тўғрисида сўраяпсиз. Бунга жавоб бера олмайман.