Дембеле узоқ муддатга сафдан чиқди

ПСЖ ҳужумчиси Усмон Дембеле Франция терма жамоасининг Украинага қарши ўйинида (0:2) олган жароҳати туфайли 6 ҳафтага яқин майдонга туша олмайди. Футболчи иккинчи бўлимда майдонга тушди ва 81-дақиқада захирага олинди. Бу ҳақда журналист Фабрис Хоукинс Х ижтимоий тармоғидаги саҳифасида маълум қилди.

Манбага кўра, Дембеле Чемпионлар лигаси умумий босқичининг 1-туридан ўрин олган "Аталанта"га қарши 17 сентябрь куни бўлиб ўтадиган учрашувда иштирок эта олмайди. Шунингдек, ҳужумчи Франция чемпионатининг 5-туридан ўрин олган "Марсель"га қарши ўйинни ўтказиб юборади.

Дембеле жорий мавсумда барча мусобақаларда 8 та ўйинда майдонга тушиб, 4 та гол ва 3 та ассистни ўз ҳисобига ёздириб қўйди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Трансфермаркт порталида келтирилган маълумотларга кўра, футболчининг бозор нархи 90 млн еврони ташкил этади.