Дешам: Мағлубиятнинг асосий сабаби шундаки, биз ёмонроқ ўйнадик

Франция терма жамоаси бош мураббийи Дидье Дешам жаҳон чемпионати ярим финалида Испанияга қарши учрашувдан кейин ўз фикрларини билдирди. Беллашув 0:2 ҳисобида испанияликлар фойдасига якунланди.

«Футболчилар руҳан ҳам, жисмонан ҳам жуда чарчаган. Лекин холис бўлишимиз керак: биз техник жиҳатдан рақибдан қолишиб кетдик. Бу – бизнинг масъулиятимиз. Шу билан бирга, савол туғилади: бу даражадаги ярим финални бошқариш учун ушбу ҳакамнинг савияси етарлими? Мен бу саволга жавоб бермайман», – деди Дешам М6 телеканалига берган интервьюсида.

Унинг таъкидлашича, ўйин давомида бир қатор баҳсли эпизодлар кузатилган, аммо мағлубиятни фақатгина ҳакамлик билан боғлаш нотўғри бўлади.

«Албатта, майдонда тортишувли вазиятлар кўп бўлди. Лекин мағлубиятнинг асосий сабаби – биз рақибдан ёмонроқ ўйнадик. Техник хатоларга йўл қўйдик, хавфли ҳужумларга олиб келиши мумкин бўлган ноаниқ паслар бердик. Бундай юқори даражадаги футболда бу жуда оғир оқибатларга олиб келади», – дея қўшимча қилди мураббий.

Дешам жамоа ўйин олдидан яхши тикланганини таъкидлади, бироқ Испаниянинг устун ўйинини тан олди.

«Менга жамоа ўйин олдидан етарлича тиклангандек туюлди… Шу билан бирга, Испания терма жамоасининг меҳнатини камситмоқчи эмасман – улар ўйинни тўлиқ назорат қилди ва муносиб равишда ғалаба қозонди», – деди у.

Франция бош мураббийи эндиликда учинчи ўрин учун бўладиган беллашувга эътибор қаратиш лозимлигини қайд этди.

«Энди биз бронза медаллари учун майдонга тушамиз. Илгариги барча меҳнатни бир зумда инкор этгим келмайди, лекин айнан шу ўйинда Испания кўпроқ нарса кўрсата олди», – деди Дешам.

У ўз келажаги ҳақида ўйлаётгани йўқлигини, асосий эътиборини жамоага қаратганини билдирди.

«Ҳозир мен ўзим ҳақимда ўйлаётганим йўқ. Бу ўйинга футболчилар билан бирга жиддий тайёрландик, мақсадимиз финалга чиқиш учун қўлимиздан келган барча ишни қилиш эди. Бунга эришолмадик. Ранжишимиз жуда катта», – дея таъкидлади мутахассис.

Франция терма жамоаси бронза медаллари учун Англия ёки Аргентинага қарши 18 июл куни майдонга тушади.