Диёр Имомхўжаев: Футзал ҳақида кетса, Марказий Осиёда 2 та яхши куч бор: Қозоғистон ва Ўзбекистон. Афсуски...

Хабарингиз бор, кеча футзал бўйича Ўзбекистон миллий терма жамоаси Францияга қарши ўртоқлик учрашуви ўтказди.

Қизиқарли кечган баҳсда вакилларимиз 4:2 ҳисобида имкониятни бой берди. Лекин ҳамюртларимиз доимгидек ажойиб тарзда, охиригача ҳаракат қилишди.

ПФЛ бош директори Диёр Имомхўжаев телеграмдаги саҳифасида футболчиларимизни мақтаб ўтди.

- Яқиндагина Ўзбекистон ва Қозоғистон футзал термалари 2 та ўртоқлик ўйинида залга чиққанди. Бирида қўшниларимиз, бошқасида биз ғолиб келдик.

Кеча футзалчиларимиз Франция футзалчиларига қарши залга чиқиб, 2:4 ҳисобида имкониятни бой берди. Қозоғистон термаси эса Европа чемпионатида Италия устидан 4:1 ҳисобида устун келиб, чорак финалга йўл олди.

Жамоавий спорт турларидан муаммоларимиз етарли экани маълум. Аммо гап футзал ҳақида кетса, Марказий Осиёда 2 та яхши куч бор: Қозоғистон ва Ўзбекистон. Афсуски, футзал олимпия спорт турлари орасида йўқ, - деди Диёр Имомхўжаев.