Диёра Келдиёрованинг устози энди Германияда ишлайди

Ўзбекистон дзюдо федерацияси раиси Азизжон Камилов мамлакат аёллар терма жамоасида узоқ муддат самарали фаолият юритган мураббий Марко Спиттка билан учрашди.

Германиялик мутахассис Ўзбекистонда аёллар дзюдосининг ўсиш динамикасига ўз ҳиссасини қўшган мураббийлардан ҳисобланади. Диёра Келдиёрованинг Олимпиада чемпиони бўлишида ҳам жаноб Спиттканинг хизмати катта бўлган. Оилавий сабабларга кўра германиялик мутахассис фаолиятини ўз мамлакатида давом эттиришга қарор қилди. 

Ўзбекистон дзюдо федерацияси раиси Азизжон Камилов ҳурмат белгиси сифатида Спитткага бир неча йиллик ҳамкорлик учун миннатдорлик билдирди ва унга зарбоп чопон кийдирди.