Доннаруммага Европанинг учта гранд клуби қизиқмоқда

Италиялик дарвозабон Жанлуижи Доннаруммага "Париж Сен-Жермен"ни тарк этиши кераклиги айтилди ва яқин бир ҳафта ичида вазиятга ойдинлик киритилади. Дарвозабон учун пойгада "Манчестер Сити", "Челси" ва "Бавария" клублари иштирок этмоқда, деб хабар беради Football Italia нашри.

Манбага кўра, яқин кунларда "Манчестер Сити" дарвозабон учун курашга фаол қўшилишга тайёр. Шунингдек, сўнги кунларда "Бавария" ҳам қизиқиш билдирганди. "Челси" эса, вазиятни кузатиб бормоқда, аммо ҳозирча Италия терма жамоаси дарвозабонининг трансфери бўйича ҳеч қандай расмий қадам ташлагани йўқ.

Аввалроқ, ПСЖ спорт директори Луиш Кампуш "Лилль" дарвозабони Люка Шевальенинг сотиб олиниши фонида жамоанинг амалдаги биринчи рақамли футболчиси Жанлуижи Доннарумманинг кетишини талаб қилаётгани ҳақида хабар берилганди.