Дзюба: Умид қиламан, Роналду жаҳон чемпионатини ютади

Тажрибали россиялик ҳужумчи Артём Дзюба журналистлар билан суҳбатда 2026 йилда бўлиб ўтадиган жаҳон чемпионати ҳақидаги фикрлари билан ўртоқлашди. Мазкур мусобақа АҚШ, Канада ва Мексика ҳудудида ўтказилиши режалаштирилган.

Дзюбанинг «Спорт-Экспресс» нашрига айтишича, у Криштиану Роналду ва Португалия терма жамоасидан келаётган мундиалда ғолибликни кутмоқда. Унинг таъкидлашича, агар португаллар Кубокни қўлга киритса, бу Роналдунинг футбол тарихидаги мақомини янада мустаҳкамлаб, уни мутлақо энг буюк футболчилардан бирига айлантиради.

«Бу таркибдаги Португалия терма жамоаси чемпион бўлишга тайёр», — дея қўшимча қилди Дзюба.

Эслатиб ўтамиз, Португалия жаҳон чемпионатида Ўзбекистон, ДР Конго ва Колумбия терма жамоалари билан бир гуруҳдан жой олган. 41 ёшли Криштиану Роналду учун ушбу мундиаль профессионал карьерасидаги сўнгги жаҳон чемпионати бўлиши кутилмоқда. У шу кунга қадар жаҳон чемпиони унвонини қўлга кирита олмаган.