Дзюдо. Анталия “Катта дубулға” турнири олдидан терма жамоамиз таркибида ўзгаришлар юз берди

Дзюдо бўйича Ўзбекистон терма жамоаси 29-31-март кунлари Туркиянинг Анталя шаҳри мезбонлик қиладиган “Катта дубулға” турнирида иштирок этиши ҳақида хабар берган эдик. Ўзбекистон дзюдо федерациясининг маълум қилишича, дастлаб таркибга киритилган 4 нафар дзюдочи мусобақани ўтказиб юборади.

Ўзгариш сабаби сифатида спортчиларнинг жароҳати кўрсатилган. Мураббийлар штаби шифокорлар билан келишган ҳолда Музаффарбек Тўрабоев (-100 кг), Алишер Юсупов (+100 кг), Ҳалима Қурбонова (-48 кг) ва Диёра Келдиёрова (-52 кг)нинг тикланиб олиши учун уларга дам беради. Ушбу спортчиларнинг ўрнига Эрназар Сарсенбаев (-100 кг) ҳамда Гулҳаё Жўраева (-52 кг) рўйхатга киритилган. Шу тариқа, мусобақада беллашадиган дзюдочиларимиз 20 нафардан 18 тага қисқарди.

Манба: МОҚ матбуот хизмати.