Дзюдо. Диёра Келдиёрова яна Жаҳон чемпионати шоҳсупасида!

Хабар берганимиздек, шу кунларда Бирлашган Араб Амирликларининг Абу-Даби шаҳрида дзюдо бўйича катталар ўртасида Жаҳон чемпионати ўтказилмоқда. Бугун аёллар ўртасида -52 кг вазн тоифасида татамига чиққан ҳамюртимиз Диёра Келдиёрова якунда кумуш медалга сазовор бўлди.

Келдиёрова чемпионлик баҳсида Олимпия ўйинларининг икки карра совриндори, италиялик Одетте Жуффрида билан беллашди. Қизиқарли кураш Жуффриданинг ғалабаси билан якунланди ва ҳамюртимиз иккинчи ўрин билан чекланди. Ушбу натижа Диёрага жаҳон ва Олимпиада рейтинги учун 1400 очко тақдим қилади. 

Маълумот учун, Диёра Келдиёрова фаолиятида кетма-кет иккинчи бор жаҳон чемпионатларининг финалида курашди. У бундан аввал 2023 йил Дохада бўлиб ўтган дунё биринчилигида ҳам кумуш медални қўлга киритган эди.