Dzyudo. Gulnoza Matniyazova professional sportchilik faoliyatini yakunladi

Parij-2024 yozgi Olimpiya o‘yinlaridan so‘ng mahoratli dzyudochimiz Gulnoza Matniyazova professional sportchilik faoliyatini rasman yakunlaganini e’lon qildi. Bu haqda O‘zbekiston Milliy Olimpiya qo‘mitasi matbuot xizmati xabar tarqatmoqda.

"Bir necha kundan so‘ng 30 yoshni qarshi oladigan sportchimiz Rio-2016, Tokio-2020 va Parij-2024 yozgi Olimpiya o‘yinlari, 3 ta Osiyo o‘yinlari, jahon chempionatlari, “Katta dubulg‘a” va Gran-pri musobaqalarida yurtimiz sharafini munosib himoya qildi. Kecha Olimpiya o‘yinlari doirasida aralash jamoaviy dasturda 3 ta terma jamoa vakillariga qarshi bahsda barcha bellashuvlarda g‘alaba qozondi va sportchilik faoliyatini yuqori notada yakunladi", - deyiladi MOQ xabarida.